हुम्लामा निर्वाचन तयारीका क्रममा सीमा क्षेत्रमा नेपाल प्रहरीको गस्ती सुरू

हुम्ला । नेपालमा प्रतिनिधि सभा निर्वाचन नजिकिँदै गर्दा सुरक्षा व्यवस्था कडा बनाउँदै नेपाल प्रहरीले सीमा क्षेत्रमा गस्ति गतिविधि सुरु गरेको छ। हुम्लाको चिनको सीमासँग जोडिएको नाम्खा गाउँपालिका–६ को लिमी लाप्चामा प्रहरी टोलीले पैदल गस्ती गरेको हो।

जिल्ला प्रहरी कार्यालय हुम्लाबाट प्रहरी सहायक निरीक्षक मञ्जुल खडकाको नेतृत्वमा ७ जनाको टोलीले नाम्खा गाउँपालिका–५ र ६ का सीमावर्ती क्षेत्रहरूको वस्तुस्थिति बुझ्ने उद्देश्यले गस्ति अभियान सञ्चालन गरेको जिल्ला प्रहरी कार्यालय हुम्लाले जनाएको छ।

डिएसपी शंकर खड्काले भने, “निर्वाचनको म्याद नजिकिँदै गर्दा हिल्सा नाका हुँदै नेपाल प्रहरी लिमि लिम्पा क्षेत्रमा गस्ति सुरू गरिएको हो। यसले दुर्गम क्षेत्रको सुरक्षा र स्थिरता कायम गर्न मद्दत पुर्‍याउनेछ।”

गस्ती टोलीले दुर्गम र जोखिमयुक्त क्षेत्रहरूमा निगरानी बढाउँदै सुरक्षा सतर्कता अपनाइरहेको छ। यस कदमले निर्वाचनको निष्पक्षता र शान्ति कायम राख्न मद्दत पुर्‍याउने विश्वास गरिएको छ। नेपाल प्रहरीले यसअघि नै सीमा र सीमावर्ती क्षेत्रहरूमा कडा निगरानी राख्दै सुरक्षा व्यवस्था मजबुत बनाएको छ। आगामी निर्वाचनलाई निष्पक्ष र सुरक्षित बनाउनका लागि निकायले थप कदमहरू चाल्ने तयारी गरेको छ।