बाजुरा जिल्लामा पाठेघरको मुखको क्यान्सरविरुद्ध १८०६ किशोरीलाई खोप लगाइँदै

बाजुरा – जिल्लामा पाठेघरको मुखको क्यान्सरविरुद्ध विस्तृत खोप अभियान सञ्चालन गरिएको छ। यस वर्ष पनि स्वास्थ्य कार्यालयले जिल्ला भरिका कक्षा ६ मा अध्ययनरत १,७८१ र विद्यालय बाहिर रहेका २५ गरी कुल १,८०६ किशोरीलाई खोप दिने योजना बनाएको हो। यो अभियान राष्ट्रिय खोप कार्यक्रमअन्तर्गत माघ २७ देखि फागुन ३ गतेसम्म सञ्चालन हुने छ।

स्वास्थ्य कार्यालयका निमित्त प्रमुख लालबहादुर खड्काले जानकारी दिएका छन्, “यस वर्ष जिल्लाका सबै विद्यालय र विद्यालय बाहिर रहेका किशोरीलाई पाठेघरको क्यान्सरविरुद्ध खोप लगाइनेछ। यसले हाम्रो समुदायलाई क्यान्सरबाट सुरक्षित राख्न मद्दत गर्नेछ।” उनले थपे, “खोप केन्द्रहरू विद्यालयमा र स्थानिय स्वास्थ्य संस्थाहरूमा स्थापना गरिएको छ, जसबाट सजिलै खोप सेवा प्राप्त गर्न सकिन्छ।”

गत वर्ष जिल्लामा सात हजारभन्दा बढी किशोरीलाई खोप लगाइएको थियो। यस वर्ष पनि विद्यालयमा अध्ययनरत र विद्यालय बाहिर रहेका किशोरीहरूलाई समेत खोप दिइने व्यवस्था गरिएको छ। बुढीगङ्गा, बडिमालिका, त्रिवेणी नगरपालिका, गौमुल गाउँपालिका र हिमाली गाउँपालिका लगायतका स्थानहरूमा खोप अभियान सञ्चालन हुने तालिका अनुसार माघ २७ देखि २९ गतेसम्म अभियान सञ्चालन हुनेछ।

खोप अभियानको मुख्य उद्देश्य पाठेघरको मुखको क्यान्सरको रोकथाम हो, जुन अत्यन्त प्रभावकारी एचपिभी खोपमार्फत सम्भव भएको स्वास्थ्य कार्यालयले जनाएको छ। गत वर्ष जिल्लाभर ९८ प्रतिशत किशोरीहरूले खोप लगाएका थिए। यस वर्ष पनि सोही उत्साह र प्रतिबद्धता देखिएको छ।

स्वास्थ्य संस्था र विद्यालयहरूको सहकार्यमा सञ्चालन भएको यस अभियानले जिल्लामा क्यान्सरको जोखिमलाई न्यूनतम बनाउन महत्वपूर्ण भूमिका खेल्ने विश्वास गरिएको छ।