मधेसका मुख्यमन्त्री : ‘सर्वोच्चको पत्र अझै पाएन, विश्वासको मत नआए राजीनामा दिन तैयार’

जनकपुरधाम । मधेस प्रदेशका मुख्यमन्त्री सरोजकुमार यादवले सर्वोच्च अदालतले २४ घण्टाभित्र विश्वासको मत लिन जारी गरेको परमादेशको आधिकारिक पत्र आफूले अहिलेसम्म प्राप्त नगरेको बताएका छन्।

सर्वोच्च अदालतले सोमबार मुख्यमन्त्री यादवलाई संविधानको प्रावधानअनुसार अत्यन्तै सीमित समयभित्र विश्वासको मत लिन आदेश दिएको थियो। तर आदेशको पत्र प्राप्त नभएकै कारण उनले त्यसबारे औपचारिक जानकारी पाउन बाँकी रहेको बताए।

मुख्यमन्त्री यादवले भने, “अब केही बेरपछि मेल खोल्छु, चिठी आएको छ कि छैन भन्ने हेर्छु।” उनले सर्वोच्च अदालतको आदेशलाई शिरोधार्य गर्दै अघि बढ्ने प्रतिबद्धता पनि व्यक्त गरे।

यादवले विश्वासको मत हासिल गर्ने प्रक्रियाबारे राजनीतिक परामर्शहरू अघि बढाइसकिएको भन्दै विश्वासको मत नपाए राजीनामा दिन तयार रहेको संकेत दिएका छन्।
उनका अनुसार, “सर्वोच्चको परमादेशलाई शिरोधार्य गरी विश्वासको मत लिनका लागि परामर्श अगाडि बढाएको छु। विश्वासको मत लिन सक्ने वा नसक्ने पहिल्यै थाहा भैहाल्छ। नसक्ने स्थिति आयो भने राजीनामा दिन्छु।”

सर्वोच्चको आदेशपछि मधेस प्रदेशको राजनीतिक वृत्तमा चहलपहल बढेका छन् भने सत्ता समीकरणमा फेरबदलको सम्भावना पनि तीव्र भएको विश्लेषकहरूको आकलन छ।