दमकमा एमालेको ठूलो आन्तरिक विभाजन: युवा संघको पदाधिकारी टोली नै बालेन शाहको समर्थनमा
- दमक ।
- दमकमा नेकपा एमालेको आन्तरिक माहोलमा ठूलो परिवर्तन आएको छ।
दमक । दमकमा नेकपा एमालेको आन्तरिक माहोलमा ठूलो परिवर्तन आएको छ। एमाले का अध्यक्ष एवं पूर्वप्रधानमन्त्री केपी शर्मा ओलीको निर्वाचन क्षेत्र र गृहनगर दमकमा पार्टीलाई एकपछि अर्को गर्दै ठूलो झट्का लागेको हो। एमाले निकट राष्ट्रिय युवा सङ्घ नेपाल दमक नगर कमिटीका अध्यक्ष र सचिवले पार्टी छाडेका छन्। यस्तै, उपाध्यक्ष विजय तामाङले पनि पार्टी र पदबाट परित्याग गर्ने घोषणा गरेका छन्।
नगर कमिटीका अध्यक्ष छवि खतिवडा र सचिव कमलप्रसाद गैरेले राजीनामा दिएर स्वतन्त्र उम्मेदवार बालेन शाहलाई समर्थन गर्ने निर्णय गरेका थिए। यसपछि उपाध्यक्ष विजय तामाङले पनि सोही बाटो रोजेका हुन। तीनै जना प्रभावशाली पदाधिकारीको एकैपटक पार्टी छोड्ने निर्णयले दमकमा एमालेको ‘लाल किल्ला’ भनिने परम्परागत शक्ति कमजोर हुन थालेको देखिएको छ।
अध्यक्ष खतिवडाले एमालेको सदस्यता समेत नरहने गरी राजीनामा दिएर झापा क्षेत्र नम्बर ५ मा स्वतन्त्र उम्मेदवार बालेन शाहलाई समर्थन गर्ने घोषणा गरेका थिए। उनले परिवर्तन र समयको मागलाई आत्मसात् गर्दै बालेनको चुनावी अभियानमा लाग्न आफूलाई प्रतिबद्ध भएको बताए। यसैगरी, सचिव गैरेले सामाजिक सञ्जालमार्फत औपचारिक रूपमा एमालेको साधारण सदस्य समेत नरहने गरी राजीनामा दिएका थिए।
अब उपाध्यक्ष विजय तामाङ पनि सोही समूहमा मिसिएपछि दमकमा एमाले निकट युवाहरु स्वतन्त्र अभियानतर्फ आकर्षित हुँदैछन्। ओलीको आफ्नै गृहनगर र निर्वाचन क्षेत्रमा युवा सङ्घको नेतृत्व तह नै पार्टी त्यागेर स्वतन्त्र उम्मेदवारको साथ दिनलाई स्थानीय राजनीतिमा महत्वपूर्ण परिवर्तनका रुपमा हेरिएको छ। परम्परागत पार्टी कार्यशैलीप्रति असन्तुष्ट युवा नेताहरुले ‘परिवर्तनका लागि स्वतन्त्र राजनीति’ भन्ने नाराका साथ बालेन शाहलाई समर्थन गर्न थालेपछि दमक एमालेभित्र ठूलो हलचल मच्चिएको छ।
प्रतिक्रिया
यो पनि पढौँ
यो पनि पढौँ
