जलेश्वर कारागारबाट भागेका फरार कैदीबन्दीको संख्या २७३ रहेको, खोजी प्रक्रिया जारी

महोत्तरी जिल्लाको जलेश्वर कारागारबाट गत भदौ २४ गते जेनजीको आन्दोलनका क्रममा भएको तोडफोड र भाग्ने प्रयासको क्रममा ५७६ कैदीबन्दी मध्ये हालसम्म २७३ जना अझै फरार रहेको जानकारी सार्वजनिक भएको छ। जेल प्रशासन र प्रहरीले जारी गरेको तथ्यांकअनुसार, जलेश्वर कारागार तोडेर भागेका ४० भारतीयसहित कैदीबन्दीको संख्या ५७६ रहेको थियो, जसमा ३०३ जना जेलमा फर्किसकेका छन्।

जेलर अशोककुमार क्षेत्रीले बताए, “अझै पनि फरार रहेका कैदीबन्दीको खोजी र पक्राउको प्रक्रिया जारी छ। भागेका केही व्यक्तिहरूको खोजी गर्न विशेष अभियान चलाइएको छ।”

कारागार तोडफोडपछि, भदौ २५ गतेदेखि नै कारागार प्रशासनले फरार कैदीबन्दीलाई पुनः कारागारमा फर्किन आह्वान गरेको थियो। उनले थप भने, “फरार कैदीबन्दीलाई नेपाल प्रहरी र स्थानिय तहको समन्वयमा खटिएको टोलीले खोजिरहेको छ। कानून अनुसार फरार व्यक्तिहरूलाई पक्राउ गर्न कानुनी प्रक्रिया अघि बढाइनेछ। साथै, उनीहरूलाई लुकाउने, आश्रय दिने वा सहयोग गर्ने व्यक्तिहरूलाई पनि कानुनी कारबाहीको सामना गर्नुपर्छ।”

उल्लेखनीय छ, जलेश्वर कारागारबाट भागेका १३ कैदीबन्दीलाई भारततर्फ भाग्दै गरेको अवस्थामा भारतीय प्रहरीले पक्राउ गरी पुनः नेपाल फर्काएको थियो। बाँकी कैदीबन्दी आफ्नै स्वेच्छाले कारागारमा फर्किएका हुन्। प्रमुख जिल्ला अधिकारी ईन्द्रदेव यादवले भने, “फरार रहेका कैदीबन्दीको खोजी कार्य तीव्र गतिमा जारी छ। हामी सबैको प्रयास छ, सबै फरार व्यक्तिहरूलाई छिट्टै पक्राउ गरी कानुनी दायरामा ल्याउने।”

यो घटना नेपाली कानून र सुरक्षा तंत्रको समक्ष चुनौतीको रुपमा आएको छ। प्रहरी र प्रशासनले भागेका कैदीबन्दीलाई पक्राउ गर्नका लागि विभिन्न अभियानहरू चलाइरहेका छन्।