बंगालको खाडीमा विकसित ‘मोन्था’ चक्रवातको प्रभाव नेपालमा सुरु, आज वर्षा र हिमपातको सम्भावना

नेपालमा बंगालको खाडीबाट विकसित भएको ‘मोनथा’ चक्रवातको प्रभाव सुरु भएको छ। मौसम पूर्वानुमान महाशाखाका अनुसार, मोन्था नामक चक्रवात भारतको आन्ध्र प्रदेश हुँदै नेपालको तराई नजिकै आइपुगेको हो। यसले नेपालको विभिन्न स्थानमा हल्का वर्षा सुरु भएको छ।

मौसम महाशाखाका अनुसार, हाल नेपालमा मोन्था चक्रवातको प्रभावका साथै पश्चिमी वायु र अरब सागरमा बनिरहेको न्यून चापीय प्रणालीको पनि आंशिक प्रभाव देखिएको छ। यसले देशभरि मौसममा परिवर्तन ल्याएको छ र आगामी दिनहरूमा वर्षा र हिमपातको सम्भावना थप बढेको छ।

आज दिउँसोको मौसम पूर्वानुमान अनुसार, कोसी प्रदेश, मधेस प्रदेश, बागमती प्रदेशका धेरै स्थानहरू, गण्डकी प्रदेश, र लुम्बिनी प्रदेशका पहाड तथा हिमाल भूभागका केही स्थानहरूमा मध्यम वर्षाको सम्भावना रहेको छ। त्यस्तै, कर्णाली प्रदेश र सुदूरपश्चिम प्रदेशका थोरै स्थानहरूमा हल्का वर्षाको सम्भावना रहेको छ। उच्च पहाड र हिमाल भूभागका केही स्थानहरूमा मध्यम हिमपातको सम्भावन पनि रहेको छ।

रात्रि समयमा भने, कोसी प्रदेश, मधेस प्रदेश र बागमती प्रदेशका अधिकांश स्थानहरू, गण्डकी प्रदेश र लुम्बिनी प्रदेशका धेरै स्थानहरूमा मध्यम वर्षाको सम्भावना छ। साथै, देशका उच्च पहाड र हिमाल भूभागका केही स्थानहरूमा मध्यम हिमपातको पनि सम्भावना रहेको छ। विशेष गरी, कोसी, बागमती र गण्डकी प्रदेशका उच्च पहाड तथा हिमाल भूभागका एक-दुई स्थानमा भारी हिमपात र भारी वर्षाको सम्भावना रहेको छ। साथै, ती प्रदेशहरूका केही स्थानहरूमा भारी वर्षा हुन सक्ने चेतावनी दिइएको छ।

मौसम महाशाखाले यस मौसम परिवर्तनलाई ध्यानमा राख्दै सर्वसाधारणलाई आवश्यक सतर्कता अपनाउन आग्रह गरेको छ। विशेष गरी उच्च हिमाली क्षेत्रहरूमा हिमपात र भारी वर्षाको सम्भावना भएकोले यात्रु र पर्वतारोहण गर्नेहरूलाई सतर्कता अपनाउन सुझाव दिइएको छ। साथै, बाढी र पहिरोको जोखिमलाई मध्यनजर गरी आवश्यक तयारी गर्न पनि महाशाखाले आग्रह गरेको छ।