चीनको हुबेई प्रान्तमा भीषण आँधीबेहरी र चक्रवात, ११ को मृत्यु, ३३१ जना घाइते, ठूलो क्षति

काठमाडौं । मध्य चीनको हुबेई प्रान्तमा सोमबार राति आएको भीषण आँधीबेहरी र चक्रवातका कारण कम्तीमा ११ जनाको मृत्यु भएको छ भने ३३१ जना घाइते भएका छन्। यस प्राकृतिक विपत्तिमा अझै एक जना बेपत्ता रहेको स्थानीय अधिकारीहरूले पुष्टि गरेका छन्।

स्थानीय प्रशासनका अनुसार, सोमबार राति ७ देखि ११ बजेसम्म हुबेईको पूर्वी क्षेत्र विशेषगरी हुआङ्सी, हुआङ्गाङ, एजोउ र सियानिङ लगायतका शहरहरूमा मेघगर्जनसहितको शक्तिशाली हावाहुरी चलेको थियो। केही स्थानमा हावाको गति ‘लेभल १३’ सम्म पुगेको थियो र चक्रवात समेत आएको जनाइएको छ।

यस भीषण हावाहुरीले भौतिक संरचनामा ठूलो क्षति पुर्‍याएको छ। अधिकारीहरूका अनुसार, आँधीका कारण २२ वटा भवन पूर्ण रूपमा भत्किएका छन् भने ४८५५ वटा घर तथा संरचनामा क्षति पुगेको छ। धेरै सडक र यातायातमार्गहरू अवरुद्ध भएको र विद्युत आपूर्ति प्रभावित भएको खबर छ।

घटनालगत्तै प्रान्तीय सरकारले प्रभावित क्षेत्रमा व्यापक रूपमा खोजी र उद्धार अभियान सञ्चालन गरिरहेको छ। घाइतेहरूको उपचारका साथै थप जोखिम न्यूनीकरण, विपद व्यवस्थापन र राहत वितरणको कामलाई तीव्र पारिएको छ। स्थानीय अधिकारीहरूले जनतासम्म आवश्यक सहायता र आपतकालीन सेवा पुर्‍याउन प्रतिबद्धता व्यक्त गरेका छन्।

प्रशासकीय स्रोतका अनुसार, हालसम्म थप ज्यान जाने वा थप घाइते हुने सम्भावना रहेकोले सतर्कता र तयारीका लागि आग्रह गरिएको छ। यस विपत्तिपछि प्रभावित क्षेत्रहरूमा पुनर्निर्माण र राहत कार्यहरू तीव्र रूपमा जारी रहेका छन्।