सप्तरीको सुरुङा नगरपालिकामा प्रेम विवाहपछि दाइजो र पारिवारिक दबावका कारण पीडित युवतीलाई अमानवीय व्यवहार।

रामशंकर भण्डारी – सुरुङा नगरपालिका १० थलहा गाउँका नागेन्द्र यादव र प्रियंका यादवबीच दुई वर्षदेखि प्रेम सम्बन्ध चलेको थियो। कृष्णा अष्टमीको अवसरमा परम्परागत सामाजिक विधिपूर्वक मन्दिरमा उनीहरूको विवाह गरिए पनि, विवाहपछि दाइजोको लोभ र पारिवारिक दबाबका कारण युवतीलाई पीडादायक परिस्थितिको सामना गर्नुपरेको छ।

विवाहको भोलिपल्टै, दाइजोको विषयलाई लिएर घर छोडेर भागेका नागेन्द्र यादव परिवारकै दबाबमा बेपत्ता भएका छन्। यसले युवती प्रियंका कुमारी यादवलाई थप पीडा दिएको हो।

युवती प्रियंकाको भनाइ अनुसार, “ससुरालीमा सुखी जीवन बिताउने आशामा बसेकी थिएँ, तर अहिले पीडादायक जीवन बिताउन बाध्य भएकी छु। ससुरालीले खाना–पानी समेत बन्द गरेका छन्।”

यस घटनाप्रति पीडित युवतीकी सासु बमभाेली यादवले भने, “मेरो छोरोले जबर्जस्ती कुटपिट गरी विवाह गराएको आरोप लगाउँदै बुहारी स्वीकार गर्न म अस्वीकार गर्छु। यदि छोरोले स्वीकारे भने, मलाई कुनै आपत्ति छैन।”

वडाध्यक्ष चन्द्र नारायण यादवले भने, “युवकले युवतीलाई स्वीकार गर्नु अनिवार्य हो। तर, युवक बेपत्ता भएपछि युवतीलाई थप पीडा भएको छ।”

प्रहरीलाई खबर गरिए पनि, अझै मुद्दा दर्ता नभएको र पीडित पक्षको कुरा नसुनेको स्थानीयको आरोप छ। यस घटनाले दाइजो प्रथालाई झनै बढावा दिने कार्य भएको देखिन्छ। स्थानीय सरकार र सम्बन्धित सरोकारवालाले यस मामिलामा ध्यान दिनु आवश्यक छ।

यस घटनाले दाइजो र सामाजिक परम्पराका नाममा हुँदै आएको अमानवीय व्यवहारप्रति गम्भीर ध्यानाकर्षण गराएको छ। पीडित युवतीको सुरक्षा र न्याय सुनिश्चित गर्न तत्काल कदम चालिन आवश्यक छ।