चितवनमा लागुऔषध (गाँजा) सहित दुई जना पक्राउ, १२४ केजी गाँजा बरामद

चितवन – चितवन जिल्लामा लागुऔषध नियन्त्रणका लागि जारी अभियानको क्रममा राप्ती नगरपालिका ११ डुम्रेखाडीबाट दुई व्यक्तिलाई गाँजा सहित पक्राउ गरिएको छ। जिल्ला प्रहरी कार्यालय चितवनले विशेष सूचनाका आधारमा गरेको कारबाहीमा उनीहरुको साथबाट करिब १२४ केजी गाँजा बरामद भएको हो।

प्रहरीले पक्राउ पर्नेमा राप्ती नगरपालिका ११ डुम्रेखाडी बस्ने ३३ वर्षीय वीरबहादुर तामाङ र ३१ वर्षीय हिरालाल तामाङ रहेको जानकारी दिएको छ। प्रहरी टोलीले उनीहरुलाई इलाका प्रहरी कार्यालय भण्डाराबाट गएको विशेष अभियान टोलीले पक्राउ गरेको हो। उनीहरु मोटरसाइकलमा गाँजा बोकेर भण्डारा तर्फ लैजादै थिए, जुन क्रममा पक्राउ परेको हो। यस क्रममा प्रहरीले तीन वटा मोटरसाइकल समेत जब्त गरेको छ। घटनास्थलबाट केही व्यक्तिहरू फरार भएका छन्, जसको खोजी भइरहेको प्रहरीको भनाइ छ।

जिल्ला प्रहरी कार्यालय चितवनले मंसिर महिनादेखि लागूऔषध नियन्त्रणका लागि “अपरेसन डेल्टा” अभियान सञ्चालन गरेको छ। यस अभियानअन्तर्गत हालसम्म ५२ वटा लागूऔषध सम्बन्धित मुद्दा दर्ता भई, ८१ जना पक्राउ परेका छन्। पक्राउ परेकामध्ये तीनजना महिला समेत रहेका छन्। प्रहरीले यस अवधिमा १५५ केजी गाँजा, ९ ग्राम चरेस, २०२ ग्राम हिरोइन, ट्रामाडोलका ५१२८ एम्पुल, फेनरागनका १३१ एम्पुल र नुर्फिनका १३१ एम्पुल समेत बरामद गरेको छ।

प्रशासन र प्रहरीले लागूऔषध नियन्त्रण अभियानलाई निरन्तरता दिँदै, यस प्रकारको कर्तव्य निरन्तर जारी रहने बताएका छन्। यसले समाजमा लागुऔषधको हानिकारक प्रभावलाई रोक्ने उद्देश्य राखिएको हो।