लगातारको वर्षाले कर्णालीका ६ जिल्लाका सडक अवरुद्ध

सुर्खेत । लगातारको वर्षापछि पहिरो र लेदो खस्दा कर्णाली प्रदेशका ६ जिल्लाका विभिन्न सडकखण्ड अवरुद्ध भएका छन्। कालीकोट, सल्यान, हुम्ला, जाजरकोट, जुम्ला र मुगुमा यातायात सेवा प्रभावित भएको कर्णाली प्रदेश प्रहरीले जनाएको छ।

प्रदेश प्रहरी कार्यालयका अनुसार कालीकोटको शुभकालिका गाउँपालिका–१ स्थित गगनेखोलामा पहिरो खसेपछि कर्णाली राजमार्ग अवरुद्ध भएको छ। सल्यानको कपुरकोट गाउँपालिका–१ स्थित खारखोला तथा वडा नं. ३ र ४ को अरिङ्गाले क्षेत्रमा पहिरो खस्दा राप्ती राजमार्गमा यातायात रोकिएको छ।

जुम्लाको तातोपानी गाउँपालिका–१ स्थित राँकामा पहिरो खसेपछि कर्णाली राजमार्गअन्तर्गतको जुम्ला–नाग्मा सडकखण्ड पनि अवरुद्ध भएको प्रहरीले जनाएको छ।

कर्णाली करिडोरका सडकखण्ड पनि प्रभावित

हुम्लाको सर्केगाड गाउँपालिका–१ स्थित खच्चामा पहिरो र लेदो सडकमा थुप्रिएपछि कर्णाली करिडोर अवरुद्ध भएको छ। सडकमा माटो र लेदो जम्दा यातायात सञ्चालनमा समस्या भएको प्रहरीले जनाएको छ।

मुगुको छायानाथ रारा नगरपालिका–७ र ८ अन्तर्गतको पिना–ताल्चा सडकखण्डमा पहिरो खसेपछि नाग्मा–गमगढी सडक अवरुद्ध भएको छ। यो सडकखण्ड पनि कर्णाली करिडोरअन्तर्गत पर्छ। जाजरकोटका विभिन्न सडकखण्डमा समेत वर्षाका कारण यातायात सेवा प्रभावित भएको प्रहरीले जनाएको छ।

लगातारको वर्षाले पहाडी क्षेत्रमा पहिरो खस्ने, लेदो बग्ने र सडक कटान हुने जोखिम बढाएको छ। सडक अवरुद्ध हुँदा यात्रु तथा सवारीसाधनको आवागमन प्रभावित भएको छ।

अवरुद्ध सडक खुलाउन सम्बन्धित निकायसँग समन्वय भइरहेको कर्णाली प्रदेश प्रहरीले जनाएको छ। प्रदेश प्रहरी प्रवक्ता प्रहरी वरिष्ठ उपरीक्षक सन्तोषसिंह राठौरका अनुसार अवरुद्ध सडकको अवस्था बुझ्ने र यातायात सञ्चालनका लागि आवश्यक पहल गर्ने काम भइरहेको छ।