सिराहा प्रहरीले ११.६२ मिलिग्राम ब्राउन सुगरसहित तिन जना पक्राउ

सिराहा – सिराहा जिल्ला प्रहरी कार्यालयले लागु औषध ब्राउन सुगरसहित तीन व्यक्तिहरूलाई पक्राउ गरेको छ। प्रहरीको अनुसार, शनिबार राति सिराहा गोलबजार ३ स्थित विकास होटल अगाडि मोटरसाइकलमा आएका व्यक्तिहरूलाई शङ्का लागी चेकजाँच गर्दा उनीहरूलाई पक्राउ गरिएको हो।

पक्राउ परेका व्यक्तिहरूमा चालक सिराहा धनगढीमाई नगरपालिका वडा नम्बर ८ का १९ वर्षीय दिपक कुमार यादव, सोही नगरपालिका वडा नम्बर ७ का २० वर्षीय आशिक महतो र वडा नम्बर ६ का १८ वर्षीय राजेश कुमार दास रहेका छन्। उनीहरूलाई  पक्राउ गरिएको हो।

प्रहरी प्रवक्ता एवं डिएसपी रमेश बहादुर पालका अनुसार, अभियुक्तहरू मधेस प्रदेश ०१–००५ प २४९३ नम्बरको मोटरसाइकलमा सवार थिए। उनीहरूलाई कसहाबाट गोलबजार आउँदै गर्दा चेकजाँचको क्रममा पक्राउ गरिएको थियो। सोही क्रममा उनीहरूसँग २ हजार ९ सय २० रुपैयाँ समेत भेटिएको छ।

प्रहरीले पक्राउ परेका तीनैजनालाई थप अनुसन्धानको लागि इलाका प्रहरी कार्यालय गोलबजारमा राखेको छ। प्रहरीको यस कार्यवाहीले लागु औषधको कारोबारविरुद्धको अभियानलाई थप तीव्रता दिएको छ।