डोल्पामा बोलेरो जिप दुर्घटना: एकजनाको मृत्यु र १३ घाइते

डोल्पा – डोल्पाको जगदुल्ला गाउँपालिका-०४ माझगाउँबाट जुम्लातर्फ जाँदै गरेको बोलेरो जिप दुर्घटना हुँदा एकजनाको मृत्यु भएको र १३ जना घाइते भएका छन्। दुर्घटना आइतबार दिउँसो करिब १:५० बजे भएको हो।

जिल्ला प्रहरी कार्यालय डोल्पाका अनुसार, कर्णाली प्रदेश नम्बर ००१ ज ००५२ नम्बरको उक्त बोलेरो जिप अनियन्त्रित भएर सडकबाट करिब २० देखि २५ मिटर तल खस्दा दुर्घटना भएको हो।

दुर्घटनामा जिपमा सवार ३८ वर्षीय विष्णु थापाको घटनास्थलमै मृत्यु भएको प्रहरीले जनाएको छ। उनी त्रिपुरासुन्दरी नगरपालिका-०८ डोल्पाका रहेका थिए। प्रहरीका अनुसार, जिपमा चालकसहित १४ जना सवार थिए। दुर्घटनामा चालकसहित अन्य १३ जना घाइते भएका छन्। घाइतेहरुको थप उपचार र उद्दारका लागि जुम्लामा पठाउने तयारी भइरहेको छ।

उद्दारका लागि चन्दननाथ नगरपालिका को एम्बुलेन्स जुम्लाबाट घटनास्थलतर्फ आइरहेको जिल्ला प्रहरी कार्यालय डोल्पाका जानकारी अधिकारी पदम रावलले बताए। घटनाबारे थप विवरण र घाइतेहरूको पहिचानको प्रक्रिया जारी रहेको प्रहरीले जनाएको छ। यो दुर्घटना नेपाली सडक सुरक्षा र वाहन सञ्चालनको सावधानीबारे पुनः सोच्नुपर्ने अवस्था हो।

अधिक जानकारीको लागि हाम्रो वेबसाइटसँग जडित रहनुहोस्।