गरुडा नगरपालिका मा ३० मिनेट भित्रै मोटरसाइकल चोरी र दुई आरोपी पक्राउ

रौतहट – गरुडा नगरपालिका–४ मा रहेको घर अगाडि पार्किङ्ग गरिएको २२० सिसीको पल्सर मोटरसाइकल चोरी भएको घटनालाई प्रहरीले ३० मिनेटभित्रै नियन्त्रणमा लिएको छ। इलाका प्रहरी कार्यालय गरुडाका प्रमुख डीएसपी शंकर प्रसाद आचार्यका अनुसार, मंगलबार बेलुका साढे ६ बजे चोरी भएको उक्त मोटरसाइकललाई चोरी गरेपछि प्रहरी टोलीले तत्क्षण घटनास्थलतर्फ परिचालन गरि कारबाही गरेको हो।

प्रहरीले जानकारी दिएका छन् कि, चोरीको खबर प्राप्त भएपछि गढ़ीमाई नगरपालिका ६ स्थित प्रहरी चौकी धर्मपुरबाट खटिएको टोलीले धरमपुर गाउँबाट निस्किने एकमात्र पुलको निगरानी गर्दै चेकजाँच गरेको थियो। त्यही क्रममा, ७ बजे चोरीको मोटरसाइकलसहित दुईजना आरोपीलाई नियन्त्रणमा लिइएको हो। पक्राउ पर्नेमा, गढ़ीमाई नगरपालिका ६ का २० वर्षका अनिल कुमार साह र सोही ठाउँका २० वर्षका राम नारायण यादव रहेका छन्।

प्रहरीले उनीहरूलाई इलाका प्रहरी कार्यालय गरुडाको नियन्त्रणमा राखेको जानकारी दिएको छ। घटनाको छानबिन र थप अनुसन्धान जारी रहेको प्रहरीले बताएको छ। यस घटनाले मोटरसाइकल चोरीको घटनामा प्रहरीको तत्परता र सक्रियता देखाएको छ भने, स्थानीय बासिन्दाहरूमा सुरक्षा र सजगता कायम गर्न मद्दत गरेको छ।