मधेस प्रदेश सभामुखको लागि आज हुने निर्वाचन, दुई उम्मेदवारबीच प्रतिस्पर्धा

जनकपुर – मधेस प्रदेशसभामा सभामुखको पदका लागि आज निर्वाचन हुने भएको छ। यस पदका लागि दुई जना उम्मेदवारले आफ्नो उम्मेदवारी दर्ता गराएका छन्। सात दलीय गठबन्धनबाट जनता समाजवादी पार्टी नेपालका प्रमुख सचेतक रामअशिष यादव र नेकपा एमालेबाट प्रदेशसभा सदस्य त्रिलोकी प्रसादले उम्मेदवारी दिएका हुन्।

रामअशिष यादवको उम्मेदवारीमा नेपाली कांग्रेसका प्रदेशसभा सदस्य वीरेन्द्रकुमार सिंहले प्रस्ताव गर्नुभएको थियो भने, यादवको समर्थनमा नेकपा माओवादी केन्द्रका प्रदेशसभा सदस्य फकिरा महतो रहेका छन्। अर्का उम्मेदवार त्रिलोकी प्रसादको समर्थन जयचन्द्रप्रसाद पटेलले गरेका छन् भने, प्रस्तावकमा शारदा देवी थापा रहेको जानकारी छ।

आज दिउँसो १ बजे बस्ने प्रदेशसभा बैठकमा सभामुखको पदका लागि मतदान हुनेछ। बैठकको अन्त्यमा सभामुख निर्वाचित गर्ने प्रस्ताव ल्याउने तयारी रहेको छ। निर्वाचन सम्पन्न भएसँगै नयाँ सभामुख चयन हुने अपेक्षा गरिएको छ।

यस निर्वाचनले प्रदेशसभाको आगामी कार्यसूची निर्धारण गर्ने महत्वपूर्ण भूमिका निर्वाह गर्ने भएकाले यसलाई विशेष रुपमा हेरिएको छ।