रवि लामिछानेले बताए, तराई, पहाड र हिमाल छुट्याउने राजनीति अब बन्द हुन्छ

जनकपुरधाम – राष्ट्रिय स्वतन्त्र पार्टी (रास्वपा) का सभापति रवि लामिछानेले अब कुनै एक क्षेत्रको नभई सम्पूर्ण नेपालका लागि विकास र समृद्धिको मार्ग प्रशस्त हुने बताएका छन्। बुधवार जनकपुरधामको जानकी मन्दिर दर्शनपछि समर्थकहरूलाई सम्बोधन गर्दै उनले यस्तो बताएका हुन्।

लामिछानेले स्पष्ट गरे, रास्वपाले विभाजन र क्षेत्रीय विभेदको राजनीतिलाई निरुत्साहित गर्दै सम्पूर्ण देशको हितमा काम गर्न प्रतिज्ञा गरेको छन्। उनले भने, “तराई, पहाड र हिमाल छुट्याएर गर्ने राजनीति अब समाप्त हुने छ। अबको नेपाल एउटा एकता र समृद्धिको राष्ट्र बन्नेछ।”

उनले देशको समग्र विकास र मधेसको सम्मानमा जोड दिए। लामिछानेले मधेसलाई दशकौंदेखि विभेद र अन्यायको चपेटामा परेको क्षेत्र भनेर स्मरण गरे, र त्यसको उचित सम्बोधन गर्न आवश्यक रहेको बताए। साथै, धार्मिक पर्यटन प्रवर्द्धन र आर्थिक समृद्धिका लागि पहल गर्न पनि आग्रह गरे।

सभापतिले अघिल्लो निर्वाचनमा सुशासनको कुरा भए पनि विभेद र विभाजनका विषयमा चुप लागिएको स्मरण गर्दै, यसपटक विभेद अन्त्य गर्न र सुशासन स्थापनाका लागि उनले गम्भीर रुपमा काम गर्ने प्रतिज्ञा व्यक्त गरे। उनको भनाइ अनुसार, अबको नेपालले सबै क्षेत्र र समुदायलाई समान अधिकार र अवसर दिनुपर्नेछ र राष्ट्रिय एकता नै समृद्धिको आधार हुने छ। यस कदमले राष्ट्रलाई नयाँ दिशामा लैजान मद्दत गर्ने विश्वास व्यक्त गरेका छन्।