काठमाडौं महानगरपालिकाको सक्रिय निगरानी, ग्यास र इन्धन अभावका नाममा कालोबजारी रोक्ने प्रयास

काठमाडौं । काठमाडौं महानगरपालिकाले खाना पकाउने ग्यास र सवारी साधनका लागि इन्धनको कृत्रिम अभाव सिर्जना गर्ने र कालोबजारी गर्ने गतिविधिहरूमा कडा निगरानी बढाएको छ। ग्यासको उपलब्धता नभएको भनि ग्राहकहरूलाई झुठो जानकारी दिएर मूल्यवृद्धि गर्ने, आवश्यक वस्तुहरू मौज्दात हुँदाहुँदै उपभोक्तालाई वितरण नगर्ने र उच्च मूल्य लिने गतिविधि बढिरहेको पाइएको भन्दै महानगरपालिकाले सक्रियता देखाएको हो।

प्रशासन विभागका प्रमुख महेश काफ्लेले भने, “ग्यास नभएको भनि गलत सूचना प्रवाह गरेर मूल्यवृद्धि गर्न र सर्वसाधारणको जीवनयापनमा असहजता सिर्जना गर्न खोज्ने गतिविधिहरूमा कारबाही प्रक्रिया सुरु गरिएको छ। नेपाल आयल निगमले ग्यासको मूल्य प्रति सिलिन्डर १,९१० रुपैयाँ तोकेको छ, त्यसै अनुसार व्यवसायी र उपभोक्ताले खरिद बिक्री गर्नुपर्छ।“

उनले थपे, “कुनै पनि उपभोक्ता वा व्यवसायीले ग्यास अभावको नाममा माग बढाउने वा सञ्चिति गर्ने प्रयास गरेमा त्यसको सम्बन्धमा निगरानी गरिनेछ। माग र आपूर्ति सन्तुलित राख्न सबैले जिम्मेवारीपूर्वक कार्य गर्न आवश्यक छ। उपभोक्ता, उद्योग र सरकार सबैको समान दायित्व छ, र सबैले आफ्ना जिम्मेवारी पूरा गर्नुपर्छ।“

पेट्रोल पम्पहरूले पनि मौज्दात इन्धन हुँदाहुँदै छैन भनि जानकारी दिएर सवारी साधनलाई सेवा नदिने गतिविधि देखिएको भन्दै महानगरपालिकाले त्यसको पनि निगरानी थालेको जनाएको छ। यदि ग्यास र इन्धन अभाव सिर्जना गर्ने कुनै पनि क्रियाकलाप देखिएमा तथ्यमा आधारित जानकारी महानगरपालिकाका हटलाइन नम्बर ११८० र ९८५१३५६५०९ मा रिपोर्ट गर्न आग्रह गरेको छ। प्राप्त जानकारीका आधारमा आवश्यक कारवाही गरिने बताइएको छ।

ग्यास विक्रेता महासंघ, नेपालका अध्यक्ष ज्ञानेश्वर अर्यालले भने, “भारतबाट आउने ग्यास नियमित रूपमा आपूर्ति भइरहेको छ। माग धेरै भएकाले अभाव देखिएको हो। उपभोक्ताले सञ्चितिका लागि माग नगरेमा समस्या हुने छैन।“यस कदमले काठमाडौंमा ग्यास र इन्धनको कृत्रिम अभावको नाममा भइरहेको कालोबजारीलाई जडबाटै नियन्त्रण गर्ने उद्देश्य राखिएको छ।