सिक्किमको नामचीमा पहिरोले दुर्घटना, ८ जनाको मृत्यु, १९ जना थुनिएको आशंका

नामची । सिक्किमको नामची जिल्लाको समरडुङ क्षेत्रमा भीषण वर्षासँगै आएको पहिरोले टिस्टा जलविद्युत् आयोजनाको निर्माणाधीन सुरुङमा पुरिँदा कम्तिमा ८ जनाको मृत्यु भएको छ। यस दुर्घटनामा परेका अन्य १९ जना मजदुरहरू सुरुङभित्रै थुनिएको आशङ्का गरिएको छ।

प्रहरी उपरीक्षक सोनाम डोमा भोटियाले बताएका छन्, “हामीले हालसम्म ८ वटा शव निकालिसकेका छौं र अझै १९ जना सुरुङभित्रै थुनिएका हुन सक्ने आशङ्का छ।” उद्धार कार्य रातभर जारी रहँदै आएको छ, तर लगातारको वर्षाका कारण उद्धारमा कठिनाइ भएको छ। खराब मौसम र कठिन भूभागका कारण सुरुमा गरिएका तीनवटा उद्धार प्रयासहरू असफल भएका थिए।

सिक्किमका मुख्यमन्त्री प्रेमसिंह तामाङ-गोलेले जिल्ला प्रशासन, प्रहरी, राज्य आपत्कालीन प्रतिक्रिया बल, अग्निनियन्त्रक सेवा र राष्ट्रिय आपत्कालीन प्रतिक्रिया बलको टोली घटनास्थलमा खटिएको जानकारी दिए। उनले उद्धार कार्यको निरन्तर अनुगमन गरिरहेको समेत बताए। सुरुङभित्र करिब ३ किलोमिटर गहिराइमा मजदुरहरू थुनिएकोले उद्धार कार्य थप जटिल भएको छ।

जिल्ला अधिकारी अनुपा ताम्लिङका अनुसार पहिरो जाँदा निजी कम्पनीका १९ जना र एनएचपीसीका ६ जना मजदुरहरू घटनास्थलमा थिए। सुरुमा तीनजना मजदुरलाई उद्धार गर्न गएको टोलीले दुई जना मात्रै बाहिर निकाल्न सकेको छ भने एक जना अझै सुरुङभित्रै रहेका छन्। यो सुरुङ एनएचपीसीको टिस्टा स्टेज ६ जलविद्युत् आयोजना अन्तर्गतको एक भाग हो।

मुख्यमन्त्री गोलेले यस दुर्घटनाप्रति गहिरो दुःख व्यक्त गर्दै मृतकका परिवारजनप्रति समवेदना प्रकट गरेका छन्। उनले बाँकी मजदुरहरूको उद्दारका लागि सबै आवश्यक संयन्त्र र टोलीहरू निरन्तर खटिरहेको सामाजिक सञ्जालमार्फत जानकारी गराएका छन्।

यस घटनाले जलविद्युत् आयोजना र स्थानीय जनता दुबैको लागि ठूलो चिन्ताको विषय बनेको छ। उद्धार कार्य जारी रहेको र मृतक तथा घाइतेहरूको सहायताका लागि सबै प्रयासहरू भइरहेको छ।