घटस्थापनामा रेखा थापा र भुवन केसीका गीत एकै समयमा सार्वजनिक, सामाजिक सञ्जालमा चर्चा

काठमाडौँ। दसैँको पहिलो दिन घटस्थापनामा अभिनेता भुवन केसी र अभिनेत्री रेखा थापाका चलचित्रका गीत एकै समयमा सार्वजनिक भएका छन्। दुवै गीत बिहान ११ बजेर ११ मिनेटमा डिजिटल प्लेटफर्ममार्फत रिलिज गरिएका हुन्।

रेखा थापाको चलचित्र ‘३६ को आँकडा’ को गीत ‘बहुलाउँछु कि क्या हो’ घटस्थापनामा सार्वजनिक हुने जानकारी उनले पहिले नै सामाजिक सञ्जालमार्फत दिएकी थिइन्। गीतबारे लेख्दै उनले भनेकी थिइन्, “कहिलेकाहीँ एउटा गीत सुन्दा मात्रै पनि मन कतै हराएजस्तो हुन्छ नि। ‘३६ को आँकडा’को यही मिठो गीत घटस्थापनामा तपाईंहरूमाझ आउँदै छ। बहुलाउन तयार हुनुहुन्छ?”

त्यसपछि अभिनेता भुवन केसीले फेसबुकमा ‘मेरो मन चोर्‍यौ सुटुक्कै’ लेख्दै आफ्नो आगामी चलचित्र ‘बटुलो जून’ को गीत सार्वजनिक हुने संकेत गरेका थिए। उनले गीत रिलिजको समय पनि आइतबार बिहान ११ बजेर ११ मिनेट हुने बताएका थिए। यसरी दुवै चलचित्रका गीतको रिलिज मिति र समय जुधेपछि सामाजिक सञ्जालमा उनीहरूबीचको ‘टक्कर’बारे चर्चा सुरु भएको छ।

चलचित्र क्षेत्रमा प्रचारप्रसारका लागि नयाँ तरिका अपनाउन सिपालु मानिने भुवनले रेखाले पहिल्यै घोषणा गरेको समयमै गीत सार्वजनिक गर्नु संयोग हो वा प्रचार रणनीति भन्नेबारे दर्शक र चलचित्र वृत्तमा अड्कलबाजी भइरहेको छ। रेखाको “बहुलाउन तयार हुनुहुन्छ?” भन्ने प्रश्नलाई भुवनले आफ्नै गीतको शीर्षकसँग जोडेर जवाफ दिएको शैलीले पनि चासो बढाएको छ।

गीतको समय जुधाउनुको कारणबारे रेखाले आफूलाई थाहा नभएको बताएकी छन्। उनले भनिन्, “गीतका लागि पहिले मैले समय निश्चित गरेकी थिएँ, त्यही समय उहाँले जुधाउनुभयो।” नेपाली चलचित्र क्षेत्रमा आफ्नै दर्शक वर्ग र बलियो लोकप्रियता भएका रेखा र भुवनका गीतमध्ये कुनले बढी दर्शकको मन जित्छ र चर्चामा अघि रहन्छ, त्यो भने आगामी दिनमा देखिनेछ।