ललितपुरमा हत्याको झूठा प्र्याङ्क भिडियो बनाउने महिला पक्राउ

ललितपुर – ललितपुरमा हत्याको झूठा प्र्याङ्क भिडियो बनाएको र त्यसलाई सामाजिक सञ्जालमार्फत झुटा अफवाह फैलाएको आरोपमा एक महिला पक्राउ परेकी छन्। जिल्ला प्रहरी परिसर ललितपुरले आइतबार महालक्ष्मी नगरपालिका वडा नं. ७ चाङ्गाथली युनाइटेड कलोनी नजिकै बस्ने २५ वर्षीया मन्दिरा गुरुङलाई नियन्त्रणमा लिएको हो।

प्रहरीका अनुसार, फलेवास नगरपालिका वडा नं. १० का घरकी गुरुङले शान्ति र सुरक्षा खलल पुर्‍याउने गरी झुटा अफवाह फैलाएपछि पक्राउ गरिएको हो। उनले आफ्नै हात र ओछ्यानमा रातो अबिर दलेर ‘मैले साथीलाई मारेँ’ भन्ने भनाइसहित भिडियो कल गरेकी थिइन्।

भिडियो कलमा हत्याको जस्तो दृश्य देखेपछि, सुस्मिता जिरेल नामकी साथीले तत्काल प्रहरीलाई खबर गरिन्। घटनाको जानकारी पाउँदा प्रहरीले तत्कालै ललितपुरको प्रहरी नियन्त्रण रुमबाट टोली परिचालन गरी उक्त डेरा कोठामा पुगेर अनुसन्धान सुरु गर्‍यो।

कोठामा खोजतलास गर्दा प्रहरीले मन्दिराको हात र ओछ्यानमा रातो अबिर दलेको देखेको थियो। सोधपुछमा उनले झुटा अफवाह फैलाएर समाजमा भ्रम र त्रास फैलाउने कार्य गरेको स्वीकार गरेकी छन्। प्रहरीका अनुसार, उक्त भिडियो प्र्याङ्क बनाउने र समाजमा अफवाह फैलाउने उद्देश्यले बनाइएको थियो।

प्रहरीले अभियोगमा उनीमाथि थप अनुसन्धान जारी राख्दै, जिल्ला प्रशासन कार्यालय ललितपुरबाट ५ दिनको म्याद थप गरी हिरासतमा राखेको जनाएको छ। यस घटनाबाट सामाजिक सञ्जालमा भ्रम फैलाउने र शान्ति र सुरक्षा व्यवस्था बिग्रने स्थितिलाई मध्यनजर गर्दै प्रहरीले कडाइका साथ मुद्दा अनुसन्धान गरिरहेको हो।