नारायणी नदीको बहाव बढ्दै, स्थानीयवासीले अस्थायी बाँध निर्माण गरी गाउँ जोगाउने प्रयास शुरू

बुटवल — नारायणी नदीको बहाव तीव्र हुँदै गाउँतर्फ पानी पस्न थालेपछि सुस्ता गाउँपालिका का स्थानीयवासीले अस्थायी बाँध निर्माणको कार्य सुरु गरेका छन्। नदीको बहाव नियन्त्रण गर्न र गाउँबस्तीलाई डुबान र कटानबाट जोगाउन स्थानीयले बोरामा माटो र बालुवा भरेर नाइलनको डोरीले बाँध निर्माण गर्न थालेका हुन्।

केही दिनअघि स्थानीयले बनाएको यस्तो अस्थायी बाँध भारतीय सीमा सुरक्षा बल (एसएसबी) ले भत्काएको आरोपपछि यो विषय चर्चामा आएको थियो। सुस्ता गाउँपालिका–५ को सुस्ता थारुटोलदेखि सीमास्थल मानिएको सिमलको रुखतर्फको क्षेत्रमा स्थानीयवासीहरु द्रुत गतिमा अस्थायी संरक्षणका उपायमा लागेका छन्।

अभियानकी नेतृ लैलाबेगम र प्रवक्ता रविन्द्र जैसवालको नेतृत्वमा स्थानीयले नदी किनारमा बोरा र डोरीको मद्दतले तटबन्ध निर्माण गरिरहेका छन्। जैसवालले भने, “नदी कटान र डुबानको जोखिमलाई मध्यनजर गरी तत्कालको लागि अस्थायी संरक्षणको काम भइरहेको छ।”

यसअघि नारायणी सिँचाइ तथा जलउत्पन्न प्रकोप व्यवस्थापन आयोजना र भरतपुरले स्थायी तटबन्ध निर्माणका लागि ठेक्का प्रक्रियामा लागेको थियो। तर, भारतीय सीमा सुरक्षा बल (एसएसबी) ले माथिल्लो तहको अनुमति आवश्यक रहेको भन्दै निर्माण कार्यमा अवरोध पुर्‍याएको स्थानीयको आरोप छ।

प्रमुख जिल्ला अधिकारी दीपकराज नेपालले भने, “नदी कटान र विपद् सम्भावनालाई ध्यानमा राख्दै अस्थायी बाँध निर्माण भइरहेको हो। केही दिनअघि स्थानीयसँग छलफल गरी तत्कालका लागि सुरक्षा उपायहरू कार्यान्वयन गरिएको छ।” उनले थपे, “मौखिक रुपमा भारतीय पक्षसँग पनि विपद् रोकथामका लागि सहमति भएको छ।”

नारायणी नदीको बहाव बढ्दै जाँदा हुन सक्ने डुबान र कटानको जोखिमलाई मध्यनजर गर्दै नेपाल गण्डक पश्चिम नहर सिँचाइ व्यवस्थापन कार्यालयले बोरा र नाइलनको डोरी उपलब्ध गराएको छ।

प्रवक्ता जैसवालका अनुसार, सिँचाइ कार्यालयबाट प्राप्त सामग्रीसहित स्थानीयले आफ्नै पुराना बोरा र डोरी प्रयोग गरी पनि अस्थायी बाँध निर्माणलाई निरन्तरता दिएका छन्। उनका अनुसार, अहिलेको मुख्य लक्ष्य नदीको बहाव नियन्त्रण गरी गाउँबस्तीलाई सुरक्षित राख्नु नै हो।