बाबुराम भट्टराई नेतृत्वको प्रलोपा बुद्ध दर्शनदेखि क्वान्टम सिद्धान्तसम्म आधारित मार्गदर्शक सिद्धान्तसहित सार्वजनिक

काठमाडौँ । डा. बाबुराम भट्टराई, जनार्दन शर्मा र सन्तोष परियारले संयुक्त रूपमा आइतबार घोषणा गरेको प्रगतिशील लोकतान्त्रिक पार्टी (प्रलोपा)ले बुद्ध दर्शनदेखि क्वान्टम सिद्धान्तसम्म समेटिएको मार्गदर्शक सिद्धान्त अँगाल्ने घोषणा गरेको छ।

प्रलोपाले सार्वजनिक गरेको संक्षिप्त राजनीतिक प्रतिबद्धतामा मार्गदर्शक सिद्धान्तका विभिन्न आधारहरू स्पष्ट पार्दै भौतिक जगतले मानिसको चेतनामा प्रभाव पार्ने र चेतनाले पुनः भौतिक जगतलाई बुझ्ने तथा परिवर्तन गर्ने क्षमताका कारण दर्शन, विचार र सिद्धान्तलाई निरन्तर पुनर्परिभाषित, पुनर्संश्लेषण र समृद्ध गर्दै जान आवश्यक पर्ने उल्लेख गरिएको छ।

‘एक्काइसौँ शताब्दीका समस्या वा अन्तर्विरोधलाई अठारौँ, उन्नाइसौँ वा बिसौँ शताब्दीका विचार–विधिबाट समाधान गर्न खोज्नु, र त्यसले निष्प्रभावी हुँदा अझै मध्ययुगीन वा अप्रमाणित अवधारणातर्फ फर्कन खोज्नु नै आधुनिक विश्व राजनीतिको ठूलो कमजोरी हो,’ प्रतिवद्धता पत्रमा भनिएको छ।

नवगठित प्रलोपा समावेशी र सहभागितामूलक लोकतन्त्रमा आधारित मौलिक नेपाली समाजवादको चरित्र निर्माण गर्ने लक्ष्यसहित अघि बढ्ने बताइएको छ।

पार्टीले बुद्ध दर्शन आत्मसात् गर्दै मार्क्सका सिद्धान्तहरूलाई आजको चौथो तथा पाँचौँ औद्योगिक क्रान्तिका सापेक्षता र क्वान्टम सिद्धान्त, जेनेटिक्स, कृत्रिम बौद्धिकता लगायत आधुनिक ज्ञान–विज्ञानले परिष्कृत द्वन्द्वात्मक ऐतिहासिक भौतिकवादसँग समायोजन गरी नेपाली समाजवादलाई मार्गदर्शक सिद्धान्त बनाउने उल्लेख गरेको छ। कम्युनिस्ट राजनीतिमा क्वान्टम सिद्धान्तले ‘साना तर गहिरा परिवर्तनहरूले ठूलो राजनीतिक रूपान्तरण सम्भव बनाउँछ’ भन्ने अर्थ राख्छ।

पार्टीले सङ्गठनात्मक सिद्धान्तका रूपमा प्रत्यक्ष लोकतन्त्रको अभ्यास गर्ने प्रतिबद्धता जनाएको छ। ‘प्रगतिशील लोकतान्त्रिक पार्टीका सबै कमिटी स्वायत्त हुनेछन्। नेताहरू छान्ने, उम्मेदवार चयन गर्ने, निर्णयहरू लिने काम सम्बन्धित कमिटीले नै गर्नेछ,’ प्रतिवद्धतामा उल्लेख छ।

विविधतायुक्त नेपाली समाजलाई ध्यानमा राख्दै जनसङ्ख्या, भूगोल, जातजाति, धर्म, क्षेत्र, लिङ्ग र उमेर समूहअनुसार प्रतिनिधित्व र सहभागिता सुनिश्चित गर्ने प्रतिबद्धता पार्टीले जनाएको छ।

‘विधि प्रधानता, सामूहिक निर्णय, समानुपातिक नेतृत्व, व्यक्तिगत जबाफदेहिता, प्रत्यक्ष निर्वाचन, आन्तरिक लोकतन्त्र, एक व्यक्ति–एक कार्यकारी पद, एक व्यक्ति–दुई कार्यकाल, फिर्ता बोलाउने व्यवस्था, स्वैच्छिक अनुशासन, वैज्ञानिक संस्कार, पर्यावरणमैत्री संगठन, कार्यगत एकता तथा संयुक्त मोर्चा आदि कार्यान्वयन गरिनेछ,’ प्रलोपालको घोषणापत्रमा उल्लेख छ।

प्रगतिशील लोकतान्त्रिक पार्टीका संरचना स्वयम्सेवा र अभियन्ताहरू स्वयंसेवी आधारमै सञ्चालन हुने पनि बताइएको छ।