सुर्खेतमा आगजनी, लुटपाट र चोरीका घटनालाई राजनीतिक आवरण दिएर ढाकछोप गर्न नमिल्ने: मुख्यमन्त्री कँडेल

सुर्खेत – कर्णाली प्रदेशका मुख्यमन्त्री यामलाल कँडेलले सुर्खेतमा भाद्र २४ गते भएको आगजनी, लुटपाट र चोरीका घटना सम्बन्धमा राजनीतिक आवरण दिएर यसलाई ढाकछोप गर्न सकिँदैन भन्ने स्पष्ट धारणा व्यक्त गरेका छन्। उनले यस किसिमका आपराधिक गतिविधिहरूमा संलग्न सबैलाई कानुनबमोजिम कडा कारबाही गरिने चेतावनी दिए।

मुख्यमन्त्री कँडेलले बुधबार सुर्खेतस्थित आफ्नै कार्यालयमा जाँचबुझ आयोगका सदस्य विश्वेश्वरप्रसाद भण्डारीसँग भएको भेटका क्रममा यस्तो बताएका हुन्। उनले भने, “अपराधलाई राजनीति भनेर ढाकछोप गरिए कानुनको शासन कमजोर हुने र अराजकता बढ्ने खतरा हुन्छ। यदि यस्तो कार्यलाई राजनीतिक शिष्टाचारको रुपमा लिइन्छ भने नागरिकको सुरक्षा र जीवनको सुरक्षा नै खतरामा पर्न सक्छ।”

उनले थपे, “अब नागरिक नै असुरक्षित हुने अवस्था आउन सक्छ। यसकारण अपराधमा संलग्न सबैलाई कानुन अनुसार कडा भन्दा कडा कारबाही गर्न आवश्यक छ।” मुख्यमन्त्री कँडेलले जाँचबुझ आयोग र प्रहरी प्रशासनले सत्यतथ्य र निष्पक्ष अनुसन्धानद्वारा दोषीलाई पहिचान गरी कारबाही गर्नुपर्नेमा जोड दिए। उनले भने, “यसै गरी, भाद्र २४ गते दिउँसो १ बजेपछि भएको आगजनी, लुटपाट र चोरीका घटनामा परेको क्षति, चाहे त्यो सार्वजनिक सम्पत्ति होस् वा व्यक्तिगत, यसलाई राजनीतिक रुपमा हेर्नु हुँदैन।”

मुख्यमन्त्रीले विगतका राजनीतिक आन्दोलनहरूमा जनआन्दोलन भए पनि कहिल्यै नागरिकको निजी सम्पत्तिमा आगजनी र लुटपाट जस्ता घटनाहरू नभएको स्मरण गराए। “यो घटनाहरू पूर्णरूपमा आपराधिक गतिविधि हुन् र यसलाई राजनीतिक रूपमा नहेरिएको नै उचित हुन्छ,” उनले भने।

यसैबीच, जाँचबुझ आयोगका सदस्य विश्वेश्वरप्रसाद भण्डारीले भने, “निजी घर जलाउने कार्यलाई हामीले स्पष्ट रूपमा आपराधिक गतिविधिको रूपमा अध्ययन गरिरहेका छौं। व्यक्तिगत घरमा भएको आगजनी, लुटपाट र चोरीका घटनाहरूलाई राजनीतिक नभएको नै मानिन्छ।”

साथै, जिल्ला प्रहरी कार्यालय सुर्खेतका प्रमुख प्रहरी उपरीक्षक सुधीरराज शाहीले हालसम्म भएको घटनाका सम्बन्धमा अनुसन्धानको प्रगति जानकारी दिएका छन्। उनले भन्या, “हामीले घटनाका फोटो र भिडियो प्रमाण सङ्कलन गरिसकेका छौं। अपराधीहरूको पहिचानको अन्तिम चरणमा छौं र केही दिनभित्रै कानुनी कारबाही अघि बढाउनेछौं।”

यसरी, सुर्खेतमा भएको आगजनी, लुटपाट र चोरीका घटनाहरूलाई लिएर सरकारी र प्रहरी निकायहरू गम्भीर रहेको देखिन्छ। अपराधी पक्राउने र घटनाको पूर्ण अनुसन्धान गर्नका लागि तयारी भइरहेका छन्। यस घटनाले सो क्षेत्रको सुरक्षा चुनौतीलाई थप गम्भीर बनाएको छ।