विराटनगरका व्यवसायी लालजीप्रसाद गुप्ता केशलिया खोलामा मृत फेला

विराटनगर । विराटनगरमा लामो समयदेखि व्यवसाय गर्दै आएका ६५ वर्षीय लालजीप्रसाद गुप्ता सुनसरीको केशलिया खोलाको किनारमा मृत फेला परेका छन्।

विराटनगर महानगरपालिका–६ र सुनसरीको बर्जु गाउँपालिका जोड्ने पुलनजिक, बर्जु गाउँपालिका–२ भीमपुरतर्फको खोला किनारमा आइतबार बिहान स्थानीयले बोरामा बेरिएको अवस्थामा शव देखेका थिए। उनीहरूले प्रहरीलाई खबर गरेपछि प्रहरी टोली घटनास्थल पुगेको थियो।

गुप्ता पछिल्लो ३० वर्षदेखि विराटनगर महानगरपालिका–६ महावीर रोडमा ‘लाल ब्याट्री पसल’ सञ्चालन गर्दै आएका थिए। उनी भारतीय नागरिक रहेको बताइएको छ।

जिल्ला प्रहरी कार्यालय सुनसरीका प्रवक्ता तथा प्रहरी नायब उपरीक्षक चन्द्र खड्काका अनुसार गुप्ता विराटनगर–६ मा ब्याट्री मर्मतसम्बन्धी पसल चलाउँथे। शव बोरामा बेरिएको अवस्थामा फेला परेकाले घटना शंकास्पद देखिएको उनले बताए।

“घटनाको प्रकृति हेर्दा हत्या गरेर शव फालिएको जस्तो देखिन्छ। विभिन्न कोणबाट विस्तृत अनुसन्धान गरिरहेका छौँ,” डीएसपी खड्काले भने। प्रहरीले घटनास्थलमा तालिमप्राप्त कुकुरसहित प्राविधिक टोली परिचालन गरी प्रमाण संकलन गरेको जनाएको छ। घटनाबारे थप अनुसन्धान भइरहेको छ।