सामाजिक सञ्जालमा झुटा प्रचारविरुद्ध कडा कदम: ६१२ भन्दा बढी हानिकारक सामग्री ट्र्याक

काठमाडौं — निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले सामाजिक सञ्जालमा झुटा प्रचार र गलत सूचना फैल्याउने गतिविधि तीव्र रूपमा बढिरहेको बारेमा चिन्ता व्यक्त गरेका छन्। उनले मौन अवधि सम्बन्धी कार्यक्रममा बोल्दै यस्तो बताएका हुन्।

भण्डारीले भने, “झुटा प्रचारका लागि सामाजिक सञ्जालको अत्यधिक प्रयोग भइरहेको छ। यसलाई नियमन र नियन्त्रणका लागि हामी निरन्तर काम गरिरहेका छौं। साथै, सञ्चार क्षेत्रको पनि जिम्मेवारी हुन्छ, गलत प्रचार रोक्नमा भूमिका खेल्न।”

उनका अनुसार एआई (आर्टिफिसियल इन्टेलिजेन्स) द्वारा सिर्जित डिपफेक (फेक तस्वीर र भिडियो) सामग्रीको प्रचारमा पनि वृद्धि भएको छ। निर्वाचन आयोगको तथ्याङ्क अनुसार शुक्रबारसम्म ६१२ भन्दा बढी हानिकारक सूचना ट्र्याक गरिएको छ। यी सूचनाहरूमाथि कारबाही प्रक्रिया अघि बढाइएको छ।

विधुतीय कारोबार ऐन २०६३ अनुसार हानिकारक सूचना फैलाउने व्यक्तिका विरुद्ध कारबाहीका लागि नेपाल प्रहरीलाई जानकारी गराइएको छ। त्यस्तै, निर्वाचन आचारसंहिता २०८२ अन्तर्गत उल्लंघन गर्ने सूचनालाई केन्द्रीय आचारसंहिता अनुगमन समितिमा पठाइएको छ। यसैगरी, प्रेस काउन्सिल ऐन २०४८ को उल्लंघन देखिएपछि आयोगले सो सम्बन्धि रिपोर्ट प्रेस काउन्सिलमा बुझाएको जनाएको छ।

निर्वाचन आयोगका प्रमुख भण्डारीले भने, “हामीले सतर्कता र निगरानीलाई तीव्रता दिएका छौं। गलत सूचना र झुटा प्रचार फैलाउने गतिविधि रोक्न आवश्यक कदम चालिरहेका छौं।”