कोलकाताको दुर्गा पूजा पण्डालमा भागदौड हुँदा १९ जनाको मृत्यु

काठमाडौं । भारतको पश्चिम बंगालस्थित कोलकाताको चोरबगानमा दुर्गा पूजा पण्डालमा भएको भागदौडमा कम्तीमा १९ जनाको मृत्यु भएको छ भने २५ जना घाइते भएका छन् ।

पश्चिम बंगालका मुख्यमन्त्री शुभेन्दु अधिकारीका अनुसार शनिबार साँझ करिब ७:३० बजे घटना भएको हो । सुरुमा १७ जनाको मृत्यु भएको पुष्टि भएकोमा पछि थप दुई जनाको मृत्यु भएको उनले बताए । घाइतेमध्ये २४ जनाको अवस्था खतरामुक्त रहेको र एक जनाको अवस्था केही गम्भीर रहेको मुख्यमन्त्री अधिकारीले जानकारी दिएका छन् ।

सरकारले मृतकका परिवारलाई जनही २५ लाख भारतीय रुपैयाँ क्षतिपूर्ति दिने र प्रत्येक परिवारका एक सदस्यलाई रोजगारी उपलब्ध गराउने घोषणा गरेको छ । घाइतेको उपचार खर्च सरकारले बेहोर्ने र उनीहरूलाई जनही पाँच लाख रुपैयाँ दिने पनि अधिकारीले बताएका छन् ।

साँघुरो बाटो र अत्यधिक भीडले दुर्घटना भएको आशंका

स्थानीय प्रत्यक्षदर्शीका अनुसार पूजा पण्डालमा अत्यधिक भीड थियो । त्यही बेला भारी वर्षा भएपछि मानिसहरू चिप्लिएर लड्दा भागदौड भएको हुन सक्ने अनुमान गरिएको छ ।

एक प्रत्यक्षदर्शीले पण्डालबाट बाहिरिने क्रममा भागदौड मच्चिएको र स्वयंसेवक तथा आवश्यक व्यवस्थापन पर्याप्त नभएको बताएका छन् । अर्का प्रत्यक्षदर्शीका अनुसार घटनास्थल जाने बाटो साँघुरो थियो र प्रकाशको व्यवस्था पनि अपर्याप्त थियो ।

घटनामा अधिकांश महिला तथा बालबालिकाको मृत्यु भएको बताइएको छ । चोरबगानमा ९१ वर्षदेखि दुर्गा पूजा आयोजना हुँदै आए पनि यसअघि यस्तो दुर्घटना नभएको स्थानीयले बताएका छन् ।

उच्च अदालतका न्यायाधीशबाट छानबिन हुने

मुख्यमन्त्री अधिकारीले घटनाको छानबिन कोलकाता उच्च अदालतका न्यायाधीशबाट गराइने बताएका छन् । कोलकाता प्रहरीले घटनास्थलको सीसीटीभी फुटेज जाँच गरिरहेको छ । लापरबाही भएको पाइए दोषीमाथि कानुनी कारबाही गरिने उनले बताए ।

पश्चिम बंगालमा करिब ५८ हजार स्थानमा दुर्गा पूजा आयोजना भइरहेको छ । यो राज्यको सबैभन्दा ठूलो र लोकप्रिय पर्व हो । कोलकाताका चर्चित पूजा पण्डाल हेर्न भारतका विभिन्न राज्यबाट ठूलो संख्यामा श्रद्धालु तथा पर्यटक पुग्ने गर्छन् ।

मोदीदेखि राहुल गान्धीसम्मले व्यक्त गरे दुःख

घटनाप्रति भारतका प्रधानमन्त्री नरेन्द्र मोदी, केन्द्रीय गृहमन्त्री अमित शाह, कांग्रेस नेता राहुल गान्धी र कांग्रेस अध्यक्ष मल्लिकार्जुन खड्गेले दुःख व्यक्त गरेका छन् । प्रधानमन्त्री मोदीले मृतकका परिवारलाई जनही दुई लाख भारतीय रुपैयाँ र घाइतेलाई जनही ५० हजार रुपैयाँ आर्थिक सहायता दिने घोषणा गरेका छन् ।

गृहमन्त्री शाहले मुख्यमन्त्री अधिकारीसँग घटनाबारे कुराकानी गरेको र आफ्ना निर्धारित कार्यक्रम स्थगित गरेर घाइतेलाई भेट्न अस्पताल जाने बताएका छन् ।

राहुल गान्धीले मृतकका परिवारप्रति समवेदना व्यक्त गर्दै घाइतेलाई तत्काल उचित उपचार उपलब्ध गराउन र घटनाको निष्पक्ष छानबिन गर्न प्रशासनसँग आग्रह गरेका छन् । खड्गेले पनि उद्धार तथा उपचारलाई प्राथमिकता दिन र भविष्यमा यस्ता दुर्घटना हुन नदिन गहन छानबिन गर्न पश्चिम बंगाल सरकारसँग माग गरेका छन् ।

टीएमसी सांसदद्वारा सरकार र प्रहरीको आलोचना

तृणमूल कांग्रेस (टीएमसी) का सांसद अभिषेक बनर्जीले घटनालाई लिएर पश्चिम बंगाल सरकार र प्रहरीको आलोचना गरेका छन् । उनले सामाजिक सञ्जाल एक्समा लेख्दै कोलकाता प्रहरी, पश्चिम बंगाल प्रहरी र मुख्यमन्त्री अधिकारीको भूमिकामाथि प्रश्न उठाएका छन् ।

पश्चिम बंगालकी पूर्वमुख्यमन्त्री ममता बनर्जीले पनि घटनाप्रति दुःख व्यक्त गर्दै घाइतेहरूको शीघ्र स्वास्थ्यलाभ र शोकाकुल परिवारलाई धैर्य धारण गर्ने शक्ति मिलोस् भनी कामना गरेकी छन् । घटनास्थल पुगेका केही स्थानीयले सामाजिक सञ्जालमा सार्वजनिक भएका भिडियो तथा रिल हेरेर पण्डाल अवलोकन गर्न आएको बताएका छन् । उनीहरू त्यहाँ पुग्दा दुर्घटना भइसकेको थियो ।