तेतरिया पुलमा दुई मोटरसाइकल ठोक्किँदा एक जनाको मृत्यु, तीन घाइते

जनकपुरधाम । धनुषाको जनकपुरधाम उपमहानगरपालिका–१७ स्थित तेतरिया पुलमा दुई मोटरसाइकल आपसमा ठोक्किँदा एक युवकको मृत्यु भएको छ भने तीन जना घाइते भएका छन्। घाइतेमध्ये दुई जनाको अवस्था गम्भीर र एक जनाको अवस्था मध्यम रहेको प्रहरीले जनाएको छ।

धनुषाका प्रहरी प्रवक्ता डीएसपी ओमप्रकाश खनालका अनुसार शनिबार राति करिब १० बजे पौडेश्वरबाट तेतरियातर्फ आउँदै गरेको ज ११ प ३०५८ नम्बरको मोटरसाइकल र विपरीत दिशाबाट आउँदै गरेको म.प्र. ०२–००९ प ११५७ नम्बरको मोटरसाइकल तेतरिया पुलमा ठोक्किएका थिए।

दुर्घटनामा ज ११ प ३०५८ नम्बरको मोटरसाइकल चालक जनकपुरधाम–१७ निवासी सुजित यादवको मृत्यु भएको हो। दुर्घटनापछि उनलाई उपचारका लागि प्रादेशिक अस्पताल जनकपुर लगिएको थियो। उपचारका क्रममा उनको मृत्यु भएको डीएसपी खनालले बताए।

सोही मोटरसाइकलमा सवार स्थानीय २५ वर्षीय बलराम यादव घाइते भएका छन्। उनको खुट्टामा चोट लागेको र प्रादेशिक अस्पतालमा उपचार भइरहेको प्रहरीले जनाएको छ।

अर्को मोटरसाइकलका चालक कमला नगरपालिका–७ निवासी २० वर्षीय रामपुकार यादव र त्यसमा सवार ३४ वर्षीय अखलेश यादव गम्भीर घाइते भएका छन्। उनीहरूको जनकपुर न्युरो अस्पतालमा उपचार भइरहेको छ।

दुर्घटनापछि उपचारमा ढिलाइ भएको भन्दै मृतकका आफन्तले प्रादेशिक अस्पतालमा तोडफोड गरेका छन्। करिब १५ देखि २० जनाको समूहमा आएका उनीहरूले ढुङ्गासमेत प्रहार गरेको प्रहरीले जनाएको छ।

ढुङ्गा प्रहार गरेको आरोपमा जनकपुरधाम–१७ निवासी २० वर्षीय गणेश यादवलाई प्रहरीले नियन्त्रणमा लिएको छ। घटनामा संलग्न अन्य व्यक्तिलाई सामान्य बल प्रयोग गरी तितरबितर पारिएको जिल्ला प्रहरी कार्यालय धनुषाले जनाएको छ।