जनकपुर चुरोट कारखानाले दाबी पेस गर्न २१ दिनको म्याद दियो

काठमाडौँ । सरकारको पूर्ण स्वामित्वमा रहेको जनकपुर चुरोट कारखाना लिमिटेडले बक्यौता तथा अन्य दायित्वको फरफारकका लागि सरोकारवालालाई २१ दिनभित्र प्रमाणसहित दाबी पेस गर्न आग्रह गरेको छ।

कारखानाको सम्पत्ति तथा दायित्व मूल्याङ्कन (डीडीए) सम्पन्न भएपछि दाबी पेस गर्न सार्वजनिक सूचना जारी गरिएको हो। मन्त्रिपरिषद्ले २०८२ वैशाख १५ गते कारखानामा रहेको सरकारी लगानी व्यवस्थापन गर्ने निर्णय गरेको थियो। सोही निर्णयअनुसार अर्थ मन्त्रालयबाट खटिएको विज्ञ टोलीले डीडीए गरेको कारखानाले जनाएको छ।

सोमबार जारी सूचनामा कारखानासँग कारोबार गरेका ग्राहक, कर्मचारी तथा अन्य सरोकारवालालाई दाबी भएमा आवश्यक प्रमाणसहित सम्पर्क गर्न भनिएको छ। कुनै निकायको फैसला वा निर्णयअनुसार लिनुपर्ने वा दिनुपर्ने रकम, जग्गा रोक्का, बिमा तथा कर्मचारीका सेवा–सुविधासम्बन्धी दाबी भए २१ दिनभित्र पेस गर्नुपर्नेछ।

कारखानालाई तिर्न वा बुझाउन बाँकी बक्यौता भएमा सम्बन्धित व्यक्ति वा संस्थाले पनि तोकिएको म्यादभित्र सम्पर्क गर्नुपर्ने सूचनामा उल्लेख छ। म्यादभित्र दाबी नपरे प्रचलित कानुनअनुसार प्रक्रिया अघि बढाइने र त्यसपछि कारखानामाथि दाबी गर्न नपाइने कारखानाले जनाएको छ।

दाबी पेस गर्न धनुषाको जनकपुरस्थित कारखाना परिसरमा सम्पर्क गर्न सकिनेछ। साथै, ९८४५१०५००८ नम्बरमा फोन गर्न वा सूचनामा उल्लेख गरिएको इमेल ठेगानामार्फत सम्पर्क गर्न सकिने व्यवस्था छ।