दाउन्ने सडकमा तीन दिनदेखि सवारी जाम: शीतलहर र निर्माणले जनजीवन अस्तव्यस्त

नवलपरासी – शीतलहरका कारण दाउन्ने क्षेत्रमा सडक चिप्लो र हिलो भएपछि नारायणगढ–बुटवल सडकखण्डमा सोमबारदेखि सुरु भएको सवारीसाधनको अवरोध अझै सहज हुन सकेको छैन। तीन दिनदेखि जारी सवारी जामले सयौं यात्रु अलपत्र परेका छन् भने जनजीवन अस्तव्यस्त बनेको छ।

सडक चिप्लो र उकालो चढ्न नसक्दा समस्या ‘जिल्ला प्रहरी कार्यालय नवलपरासी (बर्दघाट सुस्तापूर्व)का प्रहरी उपरीक्षक युवराज खड्काका अनुसार, दाउन्नेस्थित खुर्सानी खोला आसपासको सडकमा सवारीसाधन चिप्लिने र उकालो चढ्न नसक्ने समस्या देखिएपछि सोमबार बिहानदेखि यो खण्ड अस्तव्यस्त बनेको हो। शीतलहरका कारण सडक चिप्लो र हिलो हुँदा सवारीसाधन गुड्न नसकेको र यसले गर्दा सडक अवरुद्ध भएको हो। प्रहरीले विस्तारै सवारी पास गराउने प्रयास गरे पनि तीन दिनदेखि रोकिएका सवारीसाधनको व्यवस्थापन गर्न कठिन भइरहेको छ।

बाक्लो हुस्सु र एकतर्फी सडकले थपियो कठिनाई ‘जिल्ला ट्राफिक प्रहरी कार्यालय नवलपरासी (बर्दघाट सुस्तापूर्व)का सूचना अधिकारी प्रहरी वरिष्ठ नायब निरीक्षक विनोद जोशीले दाउन्नेमा बाक्लो हुस्सु र चिप्लो सडकका कारण सवारीसाधन सञ्चालनमा अत्यधिक कठिनाइ भइरहेको बताए। दुम्कीवास बजारदेखि नै सवारीसाधनको लामो जाम कायम रहेको छ। सडक निर्माणका कारण राजमार्ग एकतर्फी भएकाले लामो समयसम्म सवारी जाम हुँदा सञ्चालन गराउन निकै समस्या भएको उनको भनाइ छ।

निर्माण क्षेत्रमा शीतलहरको प्रभाव ‘नारायणगढ–बुटवल सडक योजना पश्चिम खण्डका सूचना अधिकारी इन्जिनियर विकास खनालले निर्माणाधीन क्षेत्रमा शीतलहरको प्रभाव कायमै रहेकाले पश्चिम खण्डमा अझ धेरै सवारी चाप रहेको बताए। खुर्सानी खोला क्षेत्रमा ग्राभेल हाल्ने काम भइरहेको छ र अवस्था सहज नहुँदासम्म मालवाहक सवारीसाधनलाई बर्दघाट र भुताहा क्षेत्रमा रोकेर राखिएको छ।

वैकल्पिक सडक प्रयोग गर्न अनुरोध ‘तीन दिनदेखि जारी सवारी जामका कारण सयौं यात्रु अलपत्र परेका छन्। नारायणगढ–बुटवल सडक योजना (पश्चिम खण्ड)ले सूचना जारी गर्दै अत्यावश्यकबाहेकका सवारीसाधनलाई वैकल्पिक सडक प्रयोग गर्न अनुरोध गरेको छ। दाउन्ने खण्डमा सडक निर्माण र मर्मतको कामसँगै शीतलहरले सडक हिलाम्य बनेपछि सवारीसाधन सञ्चालनमा गम्भीर समस्या देखिएको आयोजनाले जनाएको छ।