सिराहामा १० ग्रामभन्दा बढी ब्राउन सुगरसहित २० वर्षीय युवक पक्राउ

सिराहा । सिराहाको कर्जन्हा नगरपालिका–२, बन्दीपुरस्थित पूर्व–पश्चिम राजमार्गबाट ब्राउन सुगरसहित एक युवक पक्राउ परेका छन्।

जिल्ला प्रहरी कार्यालय सिराहाका अनुसार शुक्रबार राति लागूऔषध कारोबार भइरहेको भन्ने गोप्य सूचनाका आधारमा प्रहरीले पोखरातर्फ जाँदै गरेको यात्रुवाहक बस रोकेर जाँच गरेको थियो। गण्डकी प्रदेश ०१–००१ ख ०२२१ नम्बरको बसमा सवार धनगढीमाई नगरपालिका–७ का २० वर्षीय अजयकुमार यादवको जिन्स पाइन्टको बायाँ खल्तीमा कालो प्लास्टिकमा लुकाइएको अवस्थामा ब्राउन सुगर फेला परेको प्रहरीले जनाएको छ।

प्रहरीका अनुसार यादवको साथबाट १० ग्राम ४१० मिलिग्राम ब्राउन सुगर र एक थान मोबाइल बरामद भएको छ। उनलाई बरामद सामग्रीसहित इलाका प्रहरी कार्यालय मिर्चैया लगिएको छ। घटनाबारे थप अनुसन्धान भइरहेको प्रहरीले जनाएको छ।