वर्षा, बाढी र पहिरोका कारण नेपाल टेलिकमको सेवा प्रभावित

काठमाडौं । निरन्तरको वर्षा, हावाहुरी, बाढी तथा पहिरोका कारण नेपाल टेलिकमका विभिन्न स्थानमा दूरसञ्चार सेवा प्रभावित भएको छ।

नेपाल टेलिकमका अनुसार २०८३ असोज ८ गतेदेखि परेको अविरल वर्षा र हावाहुरीले देशका विभिन्न क्षेत्रमा सेवा अवरुद्ध भएको हो। भारी वर्षा र पहिरोका कारण प्राविधिक टोलीलाई प्रभावित स्थानमा पुग्न कठिनाइ भएको छ भने अप्टिकल फाइबरमा समेत क्षति पुगेको छ।

विद्युत् आपूर्तिमा आएको अवरोध तथा हिमपात, वर्षा र बादलका कारण सोलार साइटको प्रभावकारिता घट्दा सेवा सञ्चालनमा थप समस्या देखिएको कम्पनीले जनाएको छ।

टेलिकमका अनुसार सिस्टममार्फत गर्न सकिने मर्मतसम्भारका काम जारी छन्। सम्भव भएका स्थानमा सेवा मर्मत भइरहेको छ। मौसममा सुधार आएलगत्तै प्रभावित क्षेत्रमा प्राविधिक टोली परिचालन गर्न तयारी अवस्थामा राखिएको कम्पनीले जनाएको छ।

सेवा अवरुद्ध हुँदा ग्राहकलाई परेको असुविधाप्रति नेपाल टेलिकमले क्षमायाचना गरेको छ। कठिन परिस्थितिमा पनि धैर्य धारण गरेको भन्दै कम्पनीले ग्राहकप्रति आभार व्यक्त गरेको छ।