बीबीसीले आगामी दुई वर्षमा २००० कर्मचारी कटौती, खर्च घटाउने रणनीति अघि बढाउँदै

काठमाडौं – विश्वव्यापी आर्थिक दबाब र खर्च कम गर्न बीबीसीले ठूलो पुनर्संरचना योजना ल्याएको छ। यस अनुसार, बेलायती सार्वजनिक प्रसारक बीबीसीले आगामी दुई वर्षभित्र करिब २,००० कर्मचारी कटौती गर्ने योजना बनाएको छ। यस कदमले कम्पनीको खर्चमा ठूलो कटौती गर्दै ५० करोड पाउन्डसम्मको बचत गर्ने लक्ष्य राखिएको छ।

बिबिसीले खर्च घटाउने उद्देश्यले विभिन्न विभागहरूमा कर्मचारी संख्या घटाउने, केही टेलिभिजन कार्यक्रम बन्द गर्ने र नयाँ सामग्री निर्माणमा हुने खर्चमा कटौती गर्ने तयारी गरेको हो। यस योजनाअन्तर्गत, करिब ५५० पद कटौती गरिनेछ, जसले बीबीसीको न्युज, टेलिभिजन र रेडियो सञ्चालनमा प्रत्यक्ष प्रभाव पार्नेछ। यसबाट करिब १६ करोड पाउन्डको बचत हुने अपेक्षा गरिएको छ।

विशेष गरी, खेलकुद विभागबाट ४१ पद कटौती गर्न तयारी भएको छ। यसमा नयाँ पद सिर्जना गरिए पनि, मुख्य रूपमा ३६ रोजगारी घट्नेछ। कर्मचारीहरूलाई स्वैच्छिक अवकाशको विकल्प पनि उपलब्ध गराइएको छ। यस विभागबाट मात्रै करिब २६ लाख पाउन्डको बचत हुने अनुमान गरिएको छ।

प्रेस असोसिएसनले प्राप्त गरेको आन्तरिक मेमोअनुसार, चिफ कन्टेन्ट अफिसर केट फिलिप्सले आर्थिक वर्ष २०२७/२८ सम्म कन्टेन्ट डिभिजनबाट ८ करोड पाउन्डको कमिसनिङ बजेट कटौती गर्न प्रस्ताव गरेका छन्। यसका साथै, चालु आर्थिक वर्षको अन्त्यसम्म, कन्टेन्ट डिभिजनबाट करिब १०० पद कटौती हुने सम्भावना रहेको छ।

म्याननिर्देशक म्याट ब्रिटिनले गत जुन महिनामा कर्मचारीलाई पठाएको इमेलमा, ठूलो रकम बचत गर्न कठिन निर्णय लिनुपर्ने बताएका थिए। उनले सबै विभागहरूले महत्वपूर्ण बचत गर्नुपर्ने बताएका छन्। साथै, वरिष्ठ नेतृत्व तहका पदहरूमा पनि कम्तीमा १० प्रतिशत कटौती गरिने योजना छ।

यो योजना बीबीसीको पछिल्लो १५ वर्षयताकै सबैभन्दा ठूलो कर्मचारी कटौती प्रयास हो। यसले कम्पनीलाई थप प्रभावकारी र छिटो बनाउने उद्देश्य राखिएको छ। यस पुनर्संरचनाले बीबीसीलाई दीर्घकालीन रुपमा आर्थिक रुपमा स्थिर राख्न मद्दत गर्ने अपेक्षा गरिएको छ।