कारागार सुरक्षामा नेपाली सेना, खलङ्गामा टोली परिचालन

दार्चुला । दार्चुलाको सदरमुकाम खलङ्गामा रहेको कारागार कार्यालयको सुरक्षा व्यवस्था नेपाली सेनाले जिम्मा लिएको छ। बिहीबारदेखि जिल्ला कारागारको सुरक्षाको जिम्मा नेपाली सेनाले सम्हालेको हो।

सदरमुकाम खलङ्गामा रहेको श्रीदल गुल्मबाट सहसेनानि अन्वेश गुरूङको नेतृत्वमा १० जनाको टोली कारागार सुरक्षाका लागि खटिएको छ। यसअघि उक्त कारागारमा नेपाल प्रहरीको टोलीले सुरक्षा प्रदान गर्दै आएको थियो। अहिले प्रहरी टोली समेत कारागारको सुरक्षा जिम्मा सम्हालिरहेको छ।

सुरक्षा संवेदनशीलताको आधारमा, अति आवश्यक मानिएका कारागार र महत्वपूर्ण स्थानहरूमा सेना परिचालन गर्ने मन्त्रिपरिषद्को निर्णय अनुसार यो कदम चालेको हो। यस निर्णयअनुसार, दार्चुलाको अन्य स्थानहरू जस्तै कारागारमा पनि नेपाली सेना तैनाथ गरिएको प्रमुख जिल्ला अधिकारी अनिल पौडेलले बताए।

प्रशासनका अनुसार, सरकारले दिएको निर्देशन अनुसार आवश्यक समन्वय र सुरक्षा व्यवस्थापनलाई अझ प्रबल बनाउँदै अगाडि बढिएको छ। यस कदमले जिल्लाको सुरक्षा व्यवस्था थप सुदृढ हुने अपेक्षा गरिएको छ।