कर्णालीमा दोस्रो प्रादेशिक महोत्सवले कृषि, जैविक विविधता र व्यवसाय प्रवर्द्धनमा टेवा पुर्‍यायो

कर्णाली – माघ १ गतेदेखि सञ्चालनमा आएको ‘दोस्रो प्रादेशिक महोत्सव’ शनिबार सफलतापूर्वक सम्पन्न भएको छ। यस महोत्सवमा कर्णालीका मौरीपालक र परम्परागत बाली उत्पादक किसानहरूले आफ्ना उत्पादनहरू प्रदर्शनीमार्फत बिक्री र वितरण गरेका छन्। तीन दिनसम्म सञ्चालन भएको यस महोत्सवले स्थानीय कृषकहरूलाई आत्मबल, व्यवसायिक उन्नति र जैविक विविधताको संरक्षणमा महत्वपूर्ण भूमिका निर्वाह गरेको छ।

‘दोस्रो प्रादेशिक महोत्सव’ राष्ट्रिय कृषि जैविक विविधता दिवस २०८२ को अवसरमा भूमि व्यवस्था, कृषि तथा सहकारी मन्त्रालय कर्णाली प्रदेश, कृषि विकास निर्देशनालय सुर्खेत, वीरेन्द्रनगर नगरपालिका, र राष्ट्रिय तथा अन्तर्राष्ट्रिय विकास साझेदार संस्था लिबर्डसको संयुक्त आयोजनामा भएको हो। नेपाल मौरीपालक महासंघ कर्णाली प्रदेश र अन्य दर्जन बढी संस्थाको समन्वयमा आयोजना गरिएको यस महोत्सवले व्यवसायी र किसानहरूलाई आफ्ना उद्यम, व्यवसाय र कर्मप्रति थप लगनशील बनाउने प्रोत्साहन दिएको कृषि विकास निर्देशनालय सुर्खेतका निर्देशक चित्रबहादुर रोकाले बताए।

उनले भने, “महोत्सवले व्यापार र व्यवसाय प्रवर्द्धनमा योगदान पुर्याएको छ र यसले कारोबारलाई पनि तीव्रता दिएको छ।” साथै, जैविक विविधता संरक्षण र प्रवर्द्धनको महत्वलाई जोड दिँदै, निर्देशक रोकाले भने, “कर्णाली जैविक विविधतायुक्त प्रदेश भएकाले यसको संरक्षण र संवर्द्धनमा सबैको योगदान अनिवार्य छ।”

नेपाल मौरीपालक महासंघ कर्णाली प्रदेशका अध्यक्ष लीलाराम ढकालले महोत्सवमा चार क्विन्टल ७६ केजी मह बिक्री भएको जानकारी दिए। उनले थपे, “यसबाट करिब १० लाखको बिक्री र वितरण भएको छ। यस कार्यक्रमले मौरीपालक किसानलाई प्रोत्साहन, व्यवसाय प्रवर्द्धन, मह उत्पादनमा वृद्धि, बजारिकरण र प्रचारप्रसारलाई व्यापक बनाउने उद्देश्य पुरा गरेको छ।”

महोत्सवमा कर्णाली प्रदेशका भूमि व्यवस्था, कृषि तथा सहकारीमन्त्री विनोदकुमार शाहले जैविक विविधता संरक्षणको महत्व औंल्याउँदै भने, “मानव अस्तित्व जैविक विविधता संरक्षणमा नै आधारित छ। मानव गतिविधिहरूले जैविक विविधता नाश भइरहेकोले यसको संरक्षण आवश्यक छ।”

यस महोत्सवले कृषक, व्यवसायी र संरक्षणतर्फ सक्रिय सम्पूर्ण समुदायलाई एकजुट गर्न र जैविक विविधता र परम्परागत कृषिको संरक्षणमा आवश्यक दिशा निर्देश दिन सघाएको छ।