विराटनगरमा अन्तर्राष्ट्रिय मैथिली सम्मेलन सम्पन्न, मैथिली भाषा संरक्षण र विकासमा जोड

विराटनगर — प्रमुख डा. सुरेन्द्र लाभ कर्णले मैथिली लोककण्ठमा रहेसम्म जीवन्त रहने बताएका छन्। कोसी प्रदेशको विराटनगरमा शनिबारदेखि सुरु भएको दुईदिने अन्तर्राष्ट्रिय मैथिली सम्मेलन २०२५ को उद्घाटन गर्दै उनले मैथिली भाषा, संस्कृति, र साहित्यको संरक्षण तथा प्रवद्र्धन आवश्यक भएको बताए।

उद्घाटन समारोहमा बोल्दै उनले भने, “मैथिली एक समृद्ध भाषा, साहित्य र संस्कृति भएको भाषा हो। जबसम्म यो लोकभाषामा रहन्छ, तबसम्म जीवन्त रहन्छ। यसको संरक्षण र प्रवद्र्धन आवश्यक छ।” उनले आफ्नो जीवनभरि मैथिली भाषा र संस्कृतिको अभियानमा सक्रिय रहेको र आगामी दिनमा समेत यसको विकासमा प्रतिबद्ध रहेको स्पष्ट गरे। “पहिला म मैथिल हुँ, अनि त्यसपछि अरु केही,” उनले थपे।

मधेश प्रदेशका प्रमुख कर्णले यस अवसरमा समावेशीता र विविधता कायम गर्न आवश्यक रहेको बताए। उनले युवाहरूको पलायनको समस्यालाई मध्यनजर गर्दै स्थानीयस्तरमा रोजगारी सिर्जना गर्न जोड दिए। हस्तकला, चित्रकला, र अन्य उद्यमहरूमा जोड दिँदै उनले युवाहरूलाई प्रवृत्त गर्न आवश्यक रहेको बताए।

कोशी प्रदेशका पर्यटन, वन तथा वातावरण मन्त्री सदानन्द मण्डलले मैथिली भाषा, साहित्य, कला र संस्कृतिको संरक्षण र प्रवद्र्धनका लागि प्रदेश सरकार प्रतिबद्ध रहेको बताएका छन्। पूर्वमन्त्री जितेन्द्र नारायण देवले भने, “देशमै सबैभन्दा बढी बोलिने भाषा मैथिली हो, यसको संरक्षण आवश्यक छ,” भने।

मधेश प्रज्ञा प्रतिष्ठानका अध्यक्ष रामभरोस कापडि भ्रमरले प्रदेशको नाम मधेश रहँदा पनि सरकारी तवरबाट मैथिली क्षेत्रमा कामहरु भइरहेको बताए। उनले आफ्नो संस्थाले पनि स्थानीय भाषाहरुलाई प्राथमिकता दिएर काम गरिरहेको जानकारी दिए।

राष्ट्रिय समाचार समितिका अध्यक्ष धर्मेन्द्र झाले यस्ता सम्मेलन निरन्तर आयोजना हुनुपर्ने बताए। कोसी प्रदेश सरकारको सहयोग सकारात्मक रहेको उनको भनाइ थियो। मैथिली एसोसिएसन नेपाल र मैथिली सेवा समितिको संयुक्त आयोजनामा भएको उद्घाटन कार्यक्रममा विभिन्न विद्वान्, कलाकार र अभियन्ताहरूले शुभकामना व्यक्त गरे।

अध्यक्ष प्रवीण नारायण चौधरीको अनुसार, मैथिली एसोसिएशन नेपालले पुस १२ र १३ गते दुई दिनको अन्तर्राष्ट्रिय मैथिली सम्मेलन आयोजना गर्ने योजना बनाएको छ। कार्यक्रममा नेपाल, भारत र अन्य देशका करिब १०० भन्दा बढी विशिष्ट व्यक्तिहरूको सहभागिता रहनेछ।

दुई दिने सम्मेलनमा विद्यापति स्मृति सभा, शोभा यात्रा, सांस्कृतिक झाँकी प्रदर्शन, शंखघोष, उद्घाटन समारोह, विद्वत् विमर्श, कवि सम्मेलन, र सांस्कृतिक साँझ जस्ता कार्यक्रम आयोजना गरिएका छन्। सम्मेलनको अन्त्यमा ‘विराटनगर घोषणा पत्र’ जारी गरी समापन गरिनेछ।