कञ्चनपुरमा पाठेघरको मुखको क्यान्सर रोकथामका लागि ‘एचपीभी’ खोप लगाइँदै

कञ्चनपुर – जिल्लामा आजदेखि पाठेघरको मुखको क्यान्सर रोकथामका लागि ‘एचपीभी’ खोप अभियान सञ्चालन भएको छ। स्वास्थ्य कार्यालयले लक्षित समूहका किशोरी र छात्राहरुलाई लक्षित गरी यस वर्ष ५,०६७ जना किशोरीलाई खोप लगाउने योजना बनाएको छ। यो अभियान फागुन १ गतेसम्म सञ्चालन हुनेछ।

स्वास्थ्य कार्यालयका कोल्डचेन अधिकृत जनकबहादुर कुँवरका अनुसार, यस वर्षको अभियानअन्तर्गत कक्षा ६ मा अध्ययनरत छात्रा र विद्यालय बाहिरका १० वर्ष उमेरका किशोरीलाई प्राथमिकता दिइनेछ। साथै, गत वर्ष खोप छुटेका कक्षा ७ देखि १० सम्मका छात्रा र ११ देखि १४ वर्ष उमेर समूहका किशोरीलाई समेत खोप दिइनेछ।

उनका अनुसार, “प्रत्येक विद्यालयमा खोप केन्द्र तोकिएको छ। विद्यालयमा खोप नपाएको वा विद्यालय बाहिरका किशोरीहरूका लागि फागुन १ नजिकैको स्वास्थ्य संस्थामा खोप लगाउने व्यवस्था मिलाइएको छ।” उनले थपे, “साथै, जिल्लाका ९ वटा स्थानीय तहमा जम्मा ४६५ वटा खोप केन्द्र तोकिएको छ, जसमा ३६२ वटा विद्यालय र १०३ वटा स्वास्थ्य संस्था समावेश छन्। सबैभन्दा बढी खोप केन्द्र भीमदत्त नगरपालिकामा रहेको छ, जहाँ १,३९० किशोरीलाई लक्षित गरिएको छ।”

विश्व स्वास्थ्य संगठनको मतानुसार, पाठेघरको मुखको क्यान्सर महिलामा हुने क्यान्सरमध्ये उच्च जोखिमयुक्त रोग हो। नेपालमा यस रोगको प्रमुख कारण ‘ह्युमन प्यापिलोमा भाइरस’ (एचपीभी) भएको अध्ययनले देखाएको छ। स्वास्थ्यकर्मीहरू भन्छन्, किशोरी अवस्थामाै एचपीभी खोप लगाउनाले क्यान्सरको जोखिम कम हुन्छ। चिकित्सकहरूको सुझाव अनुसार, ३० वर्ष पुगेका महिलाले नियमित रूपमा पाठेघरको मुखको जाँच गराउनु आवश्यक हुन्छ।

खोप अभियान सञ्चालनका लागि सबै खोप केन्द्रहरूमा स्वास्थ्यकर्मी, महिला स्वास्थ्य स्वयंसेविका र आवश्यक सामग्री उपलब्ध गराइएको छ। सबै लक्षित समूहलाई खोप लगाउन पूर्ण सावधानी अपनाइएको छ। सरकारले यस अभियानमार्फत पाठेघरको मुखको क्यान्सरको जोखिम कम गर्न राष्ट्रिय खोप कार्यक्रमअन्तर्गत किशोरीलाई लक्षित गरी अभियान सञ्चालन गर्दै आएको छ।