गृहमन्त्री अर्यालको दावी, दुई महिनामा शान्ति र सुरक्षा पुनः स्थिर

काठमाडौँ — राष्ट्रिय सभाको संघीयता सबलीकरण तथा राष्ट्रिय सरोकार समितिमामा बोल्दै गृहमन्त्री ओमप्रकाश अर्यालले जेनजी प्रदर्शनसँगै भएको अस्थिरता र आतंककारी गतिविधिहरूलाई नियन्त्रणमा ल्याएर शान्ति सुरक्षा सामान्य अवस्थामा फर्किएको बताएका छन्। उनले बताए अनुसार, करिब दुई महिनाको अवधिमा सरकारले शान्ति र सुरक्षालाई पूर्ण रुपमा स्थिर बनाउन सफल भएको हो।

गृहमन्त्री अर्यालले भने, “हामीले जेनजी प्रदर्शन र त्यसका कारण उत्पन्न भएको अस्थिरता र सुरक्षा जोखिमलाई नियन्त्रणमा राख्न सफल भएका छौँ। यसले देशमा शान्ति सुरक्षाको स्थिरता ल्याएको छ।” उनले थपे, “यस क्रममा हामीले युवाहरूको सक्रिय सहभागिता र गृह मन्त्रालयमा स्थापना गरिएको सहायता कक्षको मद्दतले सुरक्षा जोखिम भएका व्यक्तिहरूलाई सहज रुपमा सहायता पुर्‍याउन सक्यौँ।”

अहिलेको सरकार गठनमा देखिएको अनिश्चिता र शंकालाई उनले स्मरण गराउँदै भने, “प्रारम्भिक समयमा सरकार गठनको क्रममा केही अनिश्चितता र डर थियो, तर हामीले त्यसलाई नियन्त्रणमा ल्याएर पुनः स्थिरता कायम गर्न सफल भयौँ। फेरि पनि यदि त्यस्तै रक्तपातपूर्ण अवस्था आउँछ कि भन्ने त्रास थियो, तर हामीले त्यसलाई रोक्न दृढताका साथ काम गर्यौँ।”

उनले थप जानकारी दिए, “अहिले नेपाल प्रहरीका ४६५ युनिटमध्ये ४४८ वटा सञ्चालनमा आएका छन्। साथै, १० जिल्ला प्रशासन कार्यालय र ४ वटा इलाका प्रशासन कार्यालयहरूको सेवा पुनः सुचारु गरिएको छ।”

प्रदर्शनकारीहरूमा उच्छृङ्खल गतिविधिहरूमा संलग्न ४२९ जना पक्राउ परेका छन् र उनीहरूविरुद्ध विभिन्न मुद्दा दर्ता भएको छ। मन्त्री अर्यालले बताए, “प्रदर्शनमा संलग्न ४२९ जनालाई पक्राउ गरी १६८ वटा मुद्दा दर्ता गरिएको छ। यससँगै, देशभरिका विभिन्न कारागारबाट १४ हजार ५५४ कैदीबन्दी फरार भएका थिए। हालसम्म ९ हजार ५४१ जना कैदीबन्दीलाई फिर्ता ल्याइएको छ, र बाँकी ५ हजार १३ जना फिर्ता आउन बाँकी छन्।”

सम्पूर्ण कार्यवाही र सुरक्षा प्रयासहरूलाई निरन्तरता दिँदै सरकारले देशको शान्ति र स्थिरता कायम राख्ने प्रतिबद्धता व्यक्त गरेको छ।