सडक दुर्घटनापछि आक्रोशित युवाहरूले चक्का जाम, सातबुँदे सहमतिपछि यातायात सञ्चालन

महोत्तरी — महोत्तरीको औरही नगरपालिका–८ टिम्कियामा भएको सडक दुर्घटनापछि स्थानीय युवाहरूले सडकमा उत्रिएर चक्का जाम गरेका छन्। सोमबार बिहान १० बजेदेखि बर्दिवास–जलेश्वर सडकखण्डमा टायर बालेर यातायात अवरुद्ध गरिएको हो।

राति करिब ८ः३० बजे बर्दिवासबाट जलेश्वरतर्फ जाँदै गरेको प्रदेश–२–०२००४ प ७२२२ नम्बरको मोटरसाइकलले औरही नगरपालिका–८ का ४५ वर्षीय शिवजी दयाल यादवलाई ठक्कर दिएको थियो। गम्भीर घाइते यादवको उपचारको क्रममा जनकपुर प्रादेशिक अस्पतालमा मृत्यु भएको प्रहरीले जनाएको छ।

दुर्घटनामा संलग्न मोटरसाइकल चालक लोहरपट्टी नगरपालिका–३ तपनपुर निवासी १८ वर्षीय आतिस कुमार यादव र पछाडि सवार सोही स्थानका १८ वर्षीय अमन यादवलाई इलाका प्रहरी कार्यालय रामगोपालपुरले नियन्त्रणमा लिएको छ।

घटनापछि स्थानीय युवाहरूले दोषीमाथि कडा कदम चाल्ने र पीडित परिवारलाई उचित क्षतिपूर्ति उपलब्ध गराउने माग गर्दै सडक अवरुद्ध गरेका थिए। चक्का जामका कारण करिब चार घण्टा यातायात पूर्णरूपमा प्रभावित भएको थियो।

आन्दोलनकारीहरूले मृतकको शव शीघ्र परिवारको जिम्मामा लगाउन, पीडितलाई क्षतिपूर्ति दिलाउन, कानुनी कारबाहीलाई तीव्रता दिन, औरही नगरपालिका–८ भित्र सडक फराकिलो बनाउने, सीसीटीभी जडानको लागि बजेट व्यवस्था गर्न, प्रत्येक विद्युत् पोलमा सडकबत्ती र रिफ्ल्यासिङ ट्राफिक लाइट जडान गर्न, नाला सरसफाइ गर्न र टिम्किया देखि श्रीपुर जाने सडकको बीच भागमा गोलचक्कर निर्माण गर्नुपर्ने माग राखेका थिए।

स्थानीय युवाहरूले औरही नगरपालिकाका नगरप्रमुख प्रदीप कुमार खड्कालाई सातबुँदे ज्ञापनपत्र बुझाएपछि यी मागहरूमा सहमति भएको जनाइएको छ।

नगरप्रमुख खड्काले पीडित परिवारप्रति गहिरो दुःख व्यक्त गर्दै कानुनी प्रक्रियाअनुसार क्षतिपूर्तिका लागि पहल गर्ने प्रतिबद्धता जनाए। उनले भने, “सडकहरू चरणबद्ध रूपमा फराकिलो बनाइने, सीसीटीभी जडान, सडकबत्ती र ट्राफिक लाइटको व्यवस्था मिलाइनेछ।”

साथै उनले सडक विभागसँग समन्वय गरी नाला सरसफाइ र गोलचक्कर निर्माणको कार्य अघि बढाउने बताएका छन्। नगरप्रमुखको प्रतिबद्धतापछि अवरुद्ध बर्दिवास–जलेश्वर सडकखण्ड करिब चार घण्टापछि सञ्चालनमा आएको प्रहरीले जनाएको छ।

यस घटनाले स्थानीय समुदायमा न्याय र सुरक्षाको मागलाई थप बलियो बनाएको छ भने, यातायात व्यवस्थापन र सडक सुधारका लागि सरकार र निकायहरूको ध्यान केन्द्रित भएको छ।