अमेरिकी मध्यावधि चुनावमा डेमोक्र्याटको जित, ट्रम्पको शक्ति सीमित हुने

काठमाडौं । अमेरिकाको मध्यावधि चुनावमा विपक्षी डेमोक्रेटिक पार्टीले दुवै सदनमा बहुमत हासिल गरेको छ। प्रतिनिधिसभाका ४३५ वटै सिटमा भएको चुनावमा डेमोक्र्याटले बहुमतका लागि आवश्यक २१८ सिट पार गरेका छन्। सिनेटमा पनि पार्टीले बहुमत जुटाएको छ।

कन्सासमा डेमोक्रेटिक उम्मेदवार एडम ह्यामिल्टनले रिपब्लिकन पार्टीका वर्तमान सिनेटर रोजर मार्शललाई पराजित गरेका छन्। यससँगै कन्सासबाट करिब एक शताब्दीपछि डेमोक्रेटिक सिनेटर निर्वाचित भएको दाबी गरिएको छ। यसअघि सन् १९३२ मा उक्त राज्यबाट डेमोक्रेटिक उम्मेदवार सिनेटर बनेका थिए।

मिसिगनमा डेमोक्रेटिक उम्मेदवार अब्दुल अल-सइद विजयी भएको समाचारमा उल्लेख छ। उनी अमेरिकी इतिहासमा सिनेटर निर्वाचित हुने पहिलो मुस्लिम भएको दाबी गरिएको छ। प्रतिनिधिसभाको प्रारम्भिक मतगणनामा डेमोक्र्याट २२७ सिटमा र रिपब्लिकन १४२ सिटमा अगाडि थिए। बाँकी सिटको मतगणना जारी रहेको जनाइएको छ।

सिनेटका १०० सिटमध्ये यसपटक ३५ सिटका लागि चुनाव भएको थियो। उपलब्ध विवरणअनुसार ३१ सिटको नतिजा सार्वजनिक हुँदा डेमोक्र्याटले १९ र रिपब्लिकनले १२ सिट जितेका थिए। बाँकी चार सिटको मतगणना जारी थियो। समग्र सिट संख्या जोड्दा सिनेटमा डेमोक्र्याटका ५३ र रिपब्लिकनका ४३ सिट पुगेको दाबी गरिएको छ।

गभर्नरका ३६ पदमध्ये ३१ राज्यको नतिजा सार्वजनिक हुँदा डेमोक्र्याटले २० र रिपब्लिकनले ११ पद जितेका थिए। बाँकी पाँच राज्यमा मतगणना जारी रहेको विवरणमा उल्लेख छ।

‘अमेरिकी जनताले युद्धविरुद्ध मतदान गरे’

इरानी संसद्का सभामुख मोहम्मद बाकर गालिबाफले चुनावी नतिजाबारे प्रतिक्रिया दिँदै अमेरिकी जनताले युद्ध नचाहेको सन्देश दिएको बताएका छन्। मतदाताले आफ्नो विवेक र जीविकोपार्जनसम्बन्धी चिन्तालाई ध्यानमा राख्दै युद्धविरुद्ध मतदान गरेको उनको भनाइ थियो।

एलजीबीटीक्यू मतदाताको समर्थन डेमोक्र्याटलाई

एनबीसी न्युजको एक्जिट पोललाई उद्धृत गर्दै समाचारमा एलजीबीटीक्यू मतदातामध्ये ८६ प्रतिशतले प्रतिनिधिसभाका डेमोक्रेटिक उम्मेदवारलाई मतदान गरेको उल्लेख छ। रिपब्लिकन उम्मेदवारलाई समर्थन गर्ने मतदाता १२ प्रतिशत रहेको बताइएको छ।

मिसिगनबाट निर्वाचित भएको दाबी गरिएका अल-सइदले सम्बोधनका क्रममा आफ्नो नाम र धर्मका कारण मतदाताले महँगीको सामना गर्न नपर्ने बताएका थिए। चुनाव प्रचारका क्रममा आफूलाई आतंकवादसँग जोड्ने प्रयास भएको पनि उनले उल्लेख गरे।

राष्ट्रपति डोनाल्ड ट्रम्प र उपराष्ट्रपति जेडी भ्यान्सलाई व्यङ्ग्य गर्दै उनले भने, “मेरो नाम उच्चारण गर्न तपाईंहरूलाई गाह्रो हुन्छ भन्ने मलाई थाहा छ। त्यसैले जनवरीमा सिनेटरको शपथ लिएपछि मलाई ‘सिनेटर’ भनेर बोलाउन सक्नुहुन्छ।”

अश्वेत र एसियाली मतदाताको समर्थन

तथ्याङ्कअनुसार अश्वेत र एसियाली मूलका मतदाताले डेमोक्रेटिक उम्मेदवारलाई बढी समर्थन गरेको समाचारमा जनाइएको छ।

पूर्वराष्ट्रपति बाराक ओबामाले डेमोक्रेटिक पार्टीको जितको स्वागत गर्दै मतदाताले देशलाई विभाजित होइन, एकताबद्ध गर्ने राजनीति चाहेको सन्देश दिएको बताएका छन्। ट्रम्प सरकारको कार्यकालमा अझै दुई वर्ष बाँकी रहेकाले देशको भविष्यका लागि डेमोक्र्याटले काम गर्नुपर्ने उनको भनाइ थियो।

ट्रम्पको शक्ति सीमित हुने जोखिम

दुवै सदनमा डेमोक्र्याटको नियन्त्रण भएपछि ट्रम्पलाई आफ्नो कार्यकालको बाँकी दुई वर्षमा नीति पारित गर्न कठिन हुने समाचारमा उल्लेख छ। डेमोक्र्याटले उनीविरुद्ध तेस्रो पटक महाभियोग प्रक्रिया अघि बढाउन सक्ने सम्भावनासमेत औँल्याइएको छ।

ट्रम्पले चुनावी नतिजा स्वीकार गर्दै डेमोक्र्याटसँग मिलेर काम गर्न तयार रहेको बताएका थिए। तर, उनले हारका लागि फक्स न्युजलाई दोष दिँदै च्यानलले डेमोक्रेटिक नेताहरूलाई निरन्तर स्थान दिएको आरोप लगाएका थिए। इरानसँग युद्धको सम्भावना र इन्धनको मूल्यवृद्धिले पनि चुनावी नतिजामा असर पारेको उनले स्वीकार गरेको समाचारमा उल्लेख छ।