जनकपुर बोल्ट्सको शानदार जीत: चितवन राइनोज ६ विकेटले पराजित

काठमाडौं । नेपाल प्रिमियर लिग (एनपीएल) मा जनकपुर बोल्ट्सले उत्कृष्ट प्रदर्शन गर्दै चितवन राइनोजलाई ६ विकेटले पराजित गरेको छ। टस जितेर पहिले ब्याटिङ गरेको चितवनले ४ विकेटको क्षतिमा १७६ रनको प्रतिस्पर्धात्मक योगफल तयार पारेको थियो।

१७७ रनको लक्ष्य पछ्याएको जनकपुर बोल्ट्सले १७.३ ओभरमै ४ विकेट गुमाउँदै लक्ष्य भेट्टाउँदै शानदार जीत हात पारेको छ।

जनकपुरका लागि माझ सदाकत सर्वाधिक चम्किए। उनले ६३ रनको आकर्षक पारी खेले। त्यस्तै, अनिल साहले ६१ रनको महत्वपूर्ण योगदान दिए। अन्य खेलाडीमध्ये आशिफ शेखले १८ रन, जन निकोल लफ्टी इटनले ११ रन बनाए भने आदित्य महता १८ रनमा अविजित रहे।

बलिङतर्फ चितवनका कमल सिंह ऐरी, सोहेल तान्विर र अमर रौटेलाले समान एक–एक विकेट लिए। चितवनका लागि ब्याटिङमा डेभिड मलन सर्वाधिक ८० रनसहित चम्किए। अर्जुन साउदले ५२ रन, रवि बोपराले ३ रन, सैफ जैवले ७ रन जोडे भने कुशल मल्ल ३० रनमा अविजित रहे।

जनकपुरका बलरमध्ये माझ सदाकत, अनिल साह, रुपेश सिंह र जन निकोल लफ्टी इटनले समान एक–एक विकेट हात पारे। आज अपराह्न ४ः०० बजे हुने दोस्रो खेलमा पोखरा एभेन्जर्स र कर्णाली याक्स खेल्दैछन्।

नेपाल क्रिकेट संघ (क्यान)को आयोजनामा मंसिर १ गतेदेखि सुरु भएको एनपीएलको फाइनल मंसिर २७ गते हुनेछ। प्रतियोगिताका विजेताले एक करोड १० लाख रुपैयाँ पुरस्कार प्राप्त गर्ने क्यानले जनाएको छ।

एनपीएलमा जनकपुर बोल्ट्स, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किंग्स, चितवन राइनोज, काठमाडौं गोर्खाज र लुम्बिनी लायन्स गरी आठ टोलीको सहभागिता छ।