डोल्पा कारागारबाट फरार आठमध्ये चार पक्राउ, चार जना अझै फरार
- सुर्खेत ।
- डोल्पा जिल्ला कारागारबाट फरार भएका आठ कैदीबन्दीमध्ये चार जना पक्राउ परेका छन्।
सुर्खेत । डोल्पा जिल्ला कारागारबाट फरार भएका आठ कैदीबन्दीमध्ये चार जना पक्राउ परेका छन्। मंगलबार रुकुम पश्चिमबाट दुई जना र बुधबार बिहान डोल्पाबाट थप दुई जना पक्राउ परेका हुन्। अझै चार जना फरार छन्।
डोल्पाकी प्रमुख जिल्ला अधिकारी जुनु हमालका अनुसार बुधबार बिहान ३ बजे त्रिपुरासुन्दरी नगरपालिका–४ बाट कालिप्रसाद रोकाय र कपिल परियार पक्राउ परेका हुन्। रोकाय त्रिपुरासुन्दरी नगरपालिका–७ का हुन् भने परियार जाजरकोटको नलगाड नगरपालिका–९ का हुन्।
यसअघि मंगलबार रुकुम पश्चिमबाट रामबहादुर विक र रेशम राना पक्राउ परेका थिए। आठबिसकोट नगरपालिका–१० का विक र सल्यानको कुमाख गाउँपालिका–५ का राना पक्राउ परेको प्रहरीले जनाएको छ।
फरार रहेकामा डोल्पाको त्रिपुरासुन्दरी नगरपालिका–४ का हरिबहादुर बुढा, जाजरकोटको बारेकोट गाउँपालिका–१ का यज्ञ विक तथा रुकुम पश्चिमको आठबिसकोट नगरपालिका–५ का तिलक भण्डारी र वडा नम्बर ३ का आदेश भण्डारी छन्।
गत कात्तिक १४ गते राति कारागारको भित्री पर्खाल र बाहिरी कम्पाउन्डमा सुरुङ खनेर आठ जना कैदीबन्दी फरार भएका थिए। उनीहरूको खोजी र पक्राउका लागि प्रहरीले विभिन्न क्षेत्रमा टोली परिचालन गरेको छ।
प्रतिक्रिया
यो पनि पढौँ
यो पनि पढौँ
