बडादसैँ २०८३: सशस्त्र प्रहरी बलको निशान, मौलो तथा कोत पूजा सम्पन्न

काठमाडौँ। बडादसैँ २०८३ को अवसरमा सशस्त्र प्रहरी बल, नेपालको निशान, मौलो तथा कोत पूजा मंगलबार हलचोक, स्वयम्भूस्थित नं. १९ बगलामुखी विशेष कार्यदल गणमा सम्पन्न भएको छ।

सशस्त्र प्रहरी महानिरीक्षक नारायणदत्त पौडेलको प्रमुख आतिथ्यमा बिहान ७ बजेर ३५ मिनेटको पूजाको साइतमा कार्यक्रम सुरु भएको थियो। पूजाका क्रममा महानिरीक्षक पौडेलले सशस्त्र प्रहरी बल, नेपालको निशानमा विधिपूर्वक पञ्जाछाप लगाएका थिए।

सशस्त्र प्रहरी बल, नेपालले बडादसैँका अवसरमा आफ्नो सांगठनिक परम्पराअनुसार हरेक वर्ष निशान, मौलो तथा कोत पूजा गर्दै आएको छ।

समारोहमा सशस्त्र प्रहरी बलको सलामी टोलीले निशान भगवतीलाई सलामी अर्पण गरेको थियो। त्यसपछि सशस्त्र प्रहरी अतिरिक्त महानिरीक्षक, प्रधान कार्यालय तथा उपत्यकास्थित इकाइका वरिष्ठ अधिकृत, सिनियर अधिकृत, अधिकृत र बिल्लादार जवानहरूले पूजाअर्चना तथा मौलो परिक्रमा गरेका थिए।

समारोहको समापनमा महानिरीक्षक पौडेलले मौलो पूजा व्यवस्थापन तथा सञ्चालनमा उत्कृष्ट योगदान पुर्‍याउने सशस्त्र प्रहरी कर्मचारीलाई पगरी र नगद पुरस्कार प्रदान गरेका थिए।