रसुवा–नुवाकोट बाढी प्रभावित क्षेत्रमा अस्पताल सुरक्षित, थप बिरामी आउन सक्ने

काठमाडौं – रसुवा र नुवाकोट जिल्लामा आएको बाढीले जनजीवन प्रभावित भइरहेका बेला त्रिशूली अस्पतालको सुरक्षा कायम रहेको अस्पतालका निर्देशक डा. राजेन्द्र लामाले बताएका छन्। उनी अनुसार, अस्पतालमा कार्यरत चिकित्सक र कर्मचारीहरू सबै सुरक्षित छन्।

अहिलेको अवस्थामा, बाढीबाट घाइते भएका दुई व्यक्तिको उपचार भइरहेको छ। तुप्चेबाट आएका ती दुईको खुट्टामा चोट लागेको र उनीहरूको अवस्था सामान्य रहेको डा. लामाले बताए। “दुई जना घाइतेको खुट्टामा चोट लागेको छ। उनीहरूको अवस्था सामान्य छ र उपचार भैरहेको छ,” उनले भने। साथै, बाढीका कारण मानिसहरू आत्तिएर लड्दा पनि केही व्यक्तिहरू घाइते भएको उनले उल्लेख गरे, जसको उद्धार जारी रहेको छ।

अहिलेसम्म अस्पताल सुरक्षित रहँदै आएको भए पनि आसपासको क्षेत्रहरूमा बाढीको जोखिम बढिरहेको छ। यदि अझ ठूलो बाढी आए, भने के हुने हो भन्ने निश्चित नभएको डा. लामाले बताए। “अहिलेसम्म अस्पताल सुरक्षित नै छ, तर यदि थप बाढी आयो भने अस्पतालको सुरक्षा सुनिश्चित गर्न थप तयारी भइरहेको छ,” उनले भने।

बाढीको जोखिम बढ्ने क्रममा अस्पतालमा रहेका बिरामीलाई सुरक्षित स्थानमा सार्ने तयारी गरिएको छ। अस्पतालभन्दा उच्च स्थानमा रहेका विद्यालयहरूमा बिरामीहरू स्थानान्तरण गर्न योजना बनाइएको छ, जसका लागि प्रमुख जिल्ला अधिकारी र प्रदेश सरकारसँग समन्वय भइरहेको उनले जानकारी दिए।

बाढीका कारण अस्पतालको विद्युत् आपूर्तिमा समेत समस्या आएको छ। नियमित विद्युत् आपूर्ति नभएपछि अस्पतालले डिजेलबाट चल्ने जेनेरेटरको प्रयोग गरिरहेको छ। तर, मौज्दात डिजेलको कति समयसम्म प्रयोग गर्न सकिने भन्ने निश्चित छैन। साथै, नेटवर्क सेवा प्रभावित भएकाले अस्पतालको बाह्य सम्पर्कमा समस्या परेको उनले बताए। यद्यपि, उपचार सेवाहरू सञ्चालनमा कायम रहेका छन्।

अस्पताल प्रशासनले बाढीबाट प्रभावित क्षेत्रमा अझै पनि उद्धार कार्य जारी राखिएको र थप घाइते तथा बिरामी आउन सक्ने सम्भावनालाई ध्यानमा राख्दै तयारी भइरहेकालाई पुष्टि गरेको छ।