धनकुटाको चौबिसेमा तास खेलिरहेको अवस्थामा १२ जना पक्राउ

धनकुटा । धनकुटाको चौबिसे गाउँपालिकामा तास खेलिरहेको अवस्थामा प्रहरीले १२ जनालाई नियन्त्रणमा लिएको छ। उनीहरूको साथबाट २ लाख ३६ हजार २५० रुपैयाँ नगद र २१ बुक तास बरामद भएको प्रहरीले जनाएको छ।

जिल्ला प्रहरी कार्यालय धनकुटाका अनुसार मंगलबार बिहान चौबिसे गाउँपालिका–२, डाँडागाउँस्थित दीपक सारु मगरको घरमा तास खेल भइरहेको सूचना पाएपछि इलाका प्रहरी कार्यालय राजारानीबाट प्रहरी टोली परिचालन गरिएको थियो।

प्रहरीले घरमा तास खेलिरहेका ६ जना र खेल हेरिरहेका ६ जना गरी १२ जनालाई नियन्त्रणमा लिएको हो। उनीहरूलाई आवश्यक अनुसन्धान तथा कारबाहीका लागि जिल्ला प्रहरी कार्यालय धनकुटा ल्याइएको जिल्ला प्रहरी कार्यालयका सूचना अधिकारी प्रहरी नायब उपरीक्षक हेमन्त भण्डारी क्षेत्रीले जानकारी दिए।

भण्डारीका अनुसार घटनास्थलबाट खोलिएका चार बुक र नखोलिएका १७ बुक गरी जम्मा २१ बुक तास बरामद भएको छ।

तास खेलिरहेको अवस्थामा नियन्त्रणमा लिइएकामा चौबिसे गाउँपालिका–२ का ३६ वर्षीय इमा मगर र ५३ वर्षीय राजेन्द्र मगर, वडा नं. ६ राजारानीका ४५ वर्षीय गुणराज राई, ३६ वर्षीय लेखबहादुर लिम्बु (यलेक्स) र ४२ वर्षीय योगेन लिम्बु तथा वडा नं. ७ मौनाबुधुकका ४० वर्षीय राम चेम्जोङ छन्।

त्यस्तै, तास खेल हेरिरहेको अवस्थामा नियन्त्रणमा लिइएकामा चौबिसे गाउँपालिका–२ का ३० वर्षीय सुमन मगर, २१ वर्षीय समिर मगर, २६ वर्षीय प्रजल मगर, २४ वर्षीय प्रदीप मगर, १९ वर्षीय विशाल मगर तथा वडा नं. ६ राजारानीका ३५ वर्षीय धीरेन चेम्जोङ छन्।

प्रहरीका अनुसार प्रदीप मगर दीपक सारु मगरको घरमा कोठा भाडामा लिएर बस्दै आएका थिए। घटनाबारे जिल्ला प्रहरी कार्यालय धनकुटाले अनुसन्धान अघि बढाएको छ। पक्राउ परेकामाथि प्रचलित कानुनअनुसार कारबाही प्रक्रिया अघि बढाइने प्रहरीले जनाएको छ।

यसअघि सोमबार प्रहरीले धनकुटाको हिलेबाट तास खेलिरहेको अवस्थामा आठ जनालाई नियन्त्रणमा लिएको थियो। उनीहरूको साथबाट १ लाख १४ हजार ५५० रुपैयाँ, खुला तासका चार बुक र विभिन्न अंक लेखिएका ११९ वटा गोटी बरामद भएको थियो।