लालबन्दी–सलेमपुर १३२ केभी प्रसारण लाइन सञ्चालनले सर्लाही र आसपासका क्षेत्रको विद्युत् आपूर्ति सुनिश्चितता
- सर्लाही ।
- सर्लाही जिल्ला र त्यसको दक्षिणी भेगमा विद्युत् आपूर्ति अझै थप भरपर्दो, गुणस्तरीय र स्थिर बनाउन नयाँ १३२ केभी प्रसारण लाइनको निर्माण पूरा भएको छ।
सर्लाही । सर्लाही जिल्ला र त्यसको दक्षिणी भेगमा विद्युत् आपूर्ति अझै थप भरपर्दो, गुणस्तरीय र स्थिर बनाउन नयाँ १३२ केभी प्रसारण लाइनको निर्माण पूरा भएको छ। यो प्रसारण लाइनको सञ्चालनको अन्तिम चरणमा पुगेको हो, जसले स्थानीय विद्युत् व्यवस्थापनमा महत्वपूर्ण सुधार ल्याउने अपेक्षा गरिएको छ। करिब १ अर्ब रुपैयाँ लागतमा निर्माण गरिएको यो प्रसारण लाइनलाई गत ३० साउनमा चार्ज गरिसकिएको नेपाल विद्युत् प्राधिकरणले जानकारी दिएको छ।
प्रसारण लाइनमार्फत लालबन्दी नगरपालिका–१ नवलपुरस्थित ग्रिड सबस्टेसनबाट चक्रघट्टा गाउँपालिका–७ चैनपुरामा निर्माणाधीन ग्रिड सबस्टेसनसम्म विद्युत् प्रवाह सुरु भएको छ। यसले हरिपुर, हरिपुर्वा, मलंगवा, गोडैता, र बरहथवा क्षेत्रको विद्युत् आपूर्ति अझ व्यवस्थित र भरपर्दो बनाउने भएको छ।
‘१३२ केभीको लाइन आइसकेको छ। अब यहाँबाट पाँचवटा ३३ केभी फिडर निकाल्ने योजना छ,’ आयोजना इन्जिनियर सुशान्तकुमार ठाकुरले बताए, ‘हरिपुर, हरिपुर्वा, मलंगवा, गरहैया–डुमरिया र बरहथवा फिडरमार्फत विद्युत् आपूर्ति गर्ने तयारी भइरहेको छ। तीमध्ये मलंगवा र हरिपुर फिडरमा लाइन आपूर्ति गर्ने काम अन्तिम चरणमा पुगेको छ। भदौभित्रै ती क्षेत्रमा विद्युत् प्रवाह सुरु गर्ने लक्ष्य छ।’
प्रसारण लाइनको सर्वेक्षण कार्य सन् २०७६ मा सुरु भएको थियो। निर्माणको लागि २०७९ चैत २७ गते ठेक्का सम्झौता भएको र २०८० वैशाख २६ गतेदेखि निर्माण कार्य सुरु भएको हो। आयोजना २०८३ असोज मसान्तसम्म सम्पन्न हुने लक्ष्यसहित ठेक्का सम्झौता गरिएको थियो। यस परियोजनाको जिम्मा सिग्मा कन प्रालि–एमएसपीएल जेभीले लिएको छ।
प्रसारण लाइनको निर्माणका क्रममा प्रभावित जग्गाधनीलाई ११ करोड ४० लाख रुपैयाँ मुआब्जा वितरण गरिएको छ। जसमा टावरका लागि अधिग्रहण गरिएको जग्गाबापत १० करोड रुपैयाँ र प्रभावित क्षेत्रका जग्गाधनीलाई १ करोड ४० लाख रुपैयाँ उपलब्ध गराइएको हो।
हालसम्म, दक्षिणी भेगका अधिकांश क्षेत्रमा लामो दूरीको प्रसारण लाइनमार्फत विद्युत् आपूर्ति हुने भएकाले प्राविधिक समस्या देखा परिरहेका छन्। केही वर्षअघि नवलपुरमा ग्रिड सबस्टेसनको निर्माण र विद्युत् प्रवाह सुरु भएपछि जिल्लाको उत्तरी भेगमा भोल्टेज घट्ने र अनियमित विद्युत् कटौतीका समस्या केही हदसम्म समाधान भएको थियो।
यससँगै, जिल्लामा १३२ केभी क्षमताका दुई ठूला ग्रिड सबस्टेसन पुगेका छन्। पहिला लालबन्दी नगरपालिका–१ नवलपुरमा करिब ४६ करोड रुपैयाँको लगानीमा १३२ केभी क्षमताको ग्रिड सबस्टेसन निर्माण गरी सञ्चालनमा ल्याइएको हो। नवलपुर सबस्टेसनले जिल्लाको उत्तरी र मध्य भेगमा विद्युत् आपूर्ति गर्दै आएको छ। अब सलेमपुर सबस्टेसन पूर्ण रूपमा सञ्चालनमा आएपछि, दक्षिणी भेगको विद्युत् वितरण प्रणाली थप सुदृढ हुने अपेक्षा गरिएको छ।
प्रतिक्रिया
यो पनि पढौँ
यो पनि पढौँ
