महिला सांसदहरूले साइबर बुलिङविरुद्ध नेपाल प्रहरीको साइबर ब्युरोमा गरे उजुरी दर्ता

काठमाडौँ — नेपाल कम्युनिष्ट पार्टी (एमाले) का महिला सांसदहरूले पछिल्लो समयमा बढ्दै गएको साइबर बुलिङ र यौनिकता सम्बन्धी अनलाइन दुर्व्यवहारका विषयमा नेपाल प्रहरीको साइबर ब्युरोमा उजुरी दिएका छन्।

सामाजिक सञ्जाल र विभिन्न भर्चुअल प्लेटफर्महरूमा किशोरीहरूलाई लक्षित गरी भइरहेका साइबर दुर्व्यवहार, दुव्र्यवहार, अपमानजनक टिप्पणी, घृणा र टिका टिप्पणीहरूले उनीहरूको मानसिक स्वास्थ्य र आत्मसम्मानमा गम्भीर असर परेको उजुरीमा उल्लेख गरिएको छ।

एमालेकी सचिव र प्रतिनिधिसभाका सदस्य पद्माकुमारी अर्याल, केन्द्रीय सदस्य र राष्ट्रियसभा सदस्य रामकुमारी झाँक्रीसहित १८ महिला सांसदले भोटाहिटीस्थित साइबर ब्युरोमा लिखित उजुरी दिएका हुन्। यस क्रममा उनीहरूले साइबर बुलिङका घटनाहरूलाई छिटो र प्रभावकारी रुपमा छानबिन गर्न, पीडितलाई तत्काल सुरक्षा र न्याय सुनिश्चित गर्न माग गरेका छन्।

सांसदहरूले भनेका छन्, “यस्ता व्यवहारले किशोरीहरूको आत्मबल, मानसिक स्वास्थ्य र सामाजिक सुरक्षामा गम्भीर प्रतिकूल असर पुर्‍याइरहेको छ।” सो समूहले साइबर अपराध सम्बन्धि कानुनी व्यवस्था थप कडाइका साथ कार्यान्वयन गर्न र पीडितहरूलाई संरक्षण गर्न आवश्यक कदम चाल्न आग्रह गरेको हो।

यस प्रकारको कदमले साइबर बुलिङ विरुद्धको अभियानलाई थप बलियो बनाउने विश्वास व्यक्त गरिएको छ, र सरकार तथा सम्बन्धित निकायहरूलाई यस विषयमा थप सजग र सक्रिय हुन आह्वान गरिएको छ।