कांग्रेस उपसभापति शर्माले राष्ट्रिय संकटको समाधानको लागि कांग्रेसको नेतृत्व आवश्यक बताउनुभए

महोत्तरी । नेपाली कांग्रेसका उपसभापति विश्वप्रकाश शर्माले देश अहिले जटिल परिस्थितिमा रहेको बेला समुचित समाधान गर्न कांग्रेस नै सक्षम राजनीतिक शक्ति भएको दाबी गर्नुभएको छ। महोत्तरीको सदरमुकाम जलेश्वरमा बुधबार आयोजित चुनावी कार्यक्रममा उहाँले वर्तमान चुनौतीपूर्ण समयमा कांग्रेसले नै मुलुकलाई निकास दिन सक्ने विश्वास व्यक्त गर्नुभएको हो।

उहाँले युवापुस्तामा देखिएको असन्तुष्टि र उठिरहेका प्रश्नहरूलाई गम्भीर रुपमा लिनुपर्ने आवश्यक्ता औंल्याउँदै ‘जेन–जी’ समूहका युवाहरूले उठाएका सुशासन, पारदर्शिता, रोजगारी र अवसरसम्बन्धी मागहरू जायज रहेको बताउनुभयो। उहाँको भनाइ थियो, ती मागहरूको सम्बोधन गर्न सक्ने क्षमता केवल कांग्रेससँगै रहेको छ। उपसभापति शर्माले पार्टीभित्र अहिले युवापुस्ताको सक्रिय उपस्थिति र नेतृत्व देखिनु सकारात्मक संकेत भएको पनि उल्लेख गर्नुभयो।

कांग्रेस अब विकास, सुशासन र आर्थिक समृद्धिको स्पष्ट एजेन्डासहित अघि बढ्ने प्रतिबद्धता व्यक्त गर्दै उहाँले भने, “निर्वाचनका क्रममा उम्मेदवारहरूले जनतासँग गरेका प्रतिबद्धता कार्यान्वयन भए–नभएको विषयमा पार्टीको केन्द्रीय कार्यालयबाटै अनुगमन गरिनेछ। जनतासँग गरिएको प्रतिबद्धता कागजमा सीमित रहनु हुँदैन, त्यसको कार्यान्वयनको जिम्मेवारी पार्टीले लिनेछ। आवश्यक परे उम्मेदवारको कार्यसम्पादनको मूल्यांकन गरी कारबाहीसमेत गरिनेछ।”

उहाँले देशलाई राजनीतिक अस्थिरता, निराशा र कमजोर अर्थतन्त्रबाट उकास्न कांग्रेसले फेरि नेतृत्वदायी भूमिका खेल्ने बताउनुभयो। चुनौतीलाई अवसरमा परिणत गर्दै विकासको नयाँ चरणमा प्रवेश गराउने प्रतिबद्धता व्यक्त गर्दै मतदातालाई लोकतान्त्रिक शक्तिको पक्षमा उभिन आह्वान गर्नुभयो। ऐतिहासिक परिवर्तनका प्रत्येक चरणमा कांग्रेसको नेतृत्वदायी भूमिका रहेको स्मरण गराउँदै उहाँले राणाशासनको अन्त्य, राजसंस्थाको अवसान र शान्ति प्रक्रिया मार्फत देशलाई द्वन्द्वबाट मुक्त गराउने अभियानमा कांग्रेसको अग्रणी भूमिका रहेको बताउनुभयो।

कार्यक्रमअघि उपसभापति शर्माले जलेश्वरस्थित सहिद पार्कमा पुगेर सहिदहरूको स्मारकमा माल्यार्पण गर्नुभएको थियो। सहिदहरूको बलिदानको कारण मुलुकमा लोकतान्त्रिक व्यवस्था स्थापना भएको भन्दै उहाँले लोकतन्त्रको रक्षा र सुदृढीकरण सबैको साझा दायित्व भएको बताउनुभयो।