शेर्पा समुदायले ग्याल्पो ल्होसार पर्व उत्साहपूर्वक मनाउँदै

काठमाडौँ — शेर्पा समुदायले आज विभिन्न परम्परागत र सांस्कृतिक कार्यक्रमहरू आयोजना गरी ग्याल्पो ल्होसार पर्व मनाइरहेका छन्। ल्हो अर्थात् वर्ष र छार भनेको नयाँ भन्ने अर्थ हुन्छ। यस पर्वलाई नेपाली हिमाली क्षेत्रका शेर्पा समुदायले नयाँ वर्षको रूपमा मनाउने परम्परा रहेको छ।

ग्याल्पो ल्होसारको अवसरमा, शेर्पा समुदायले आफ्ना गाउँघर र टोलका बाटोघाटो तथा पानीका मूलहरू सरसफाइ गर्ने कार्य गरिरहेका छन्। साथै, परिकारको रूपमा नौ प्रकारको अन्न मिसिएको गुथुक र खाप्से खानु परम्परा हो। यस पर्वलाई शुभकामना आदानप्रदान गर्दै नयाँ वर्षको स्वागत गर्न र सामाजिक मेलमिलापलाई प्रवर्द्धन गर्न विशेष कार्यक्रमहरू आयोजना गरिन्छ।

नेपालको हिमाली क्षेत्रमा बसोबास गर्ने शेर्पा समुदाय र महायान बौद्ध परम्परामा यो पर्व चन्द्रमास गणना गरी फागुन शुक्लपक्ष प्रतिपदा तिथिमा मनाइन्छ। यस दिन, स्याब्रु नृत्य, तुङ्गना (डम्याङ) को मधुर धुन र सामूहिक उल्लासले ग्याल्पो ल्होसारलाई अझ पावन र अर्थपूर्ण बनाउँछ।

यो पर्वले नयाँ आशा, उमङ्ग र उल्लास बोकेर समाजमा प्रेम, भाइचारा, सद्भाव र एकताको भावना अझ बलियो बनाउने विश्वास व्यक्त गरिएको छ। यस पर्वले परिवार, मित्रता र समुदायबीचको सम्बन्धलाई अझ घनिष्ठ बनाउँदै सहकार्य र समझदारीको वातावरण सिर्जना गर्दछ।

अवसरमा गुम्बा दर्शन, धर्मगुरु र लामाबाट आशिर्वाद प्राप्त गर्ने परम्परा कायम राखिएको छ। साथै, परिकार खाप्से, डेशिल र गुथुकको स्वाद लिनु र परिवारसँग मिलेर उल्लासपूर्वक समय बिताउनु नेपालीहरुको मौलिक पहिचान हो। यस पर्वले नेपाली सांस्कृतिक धरोहरलाई जोगाउँदै नयाँ उत्साह र उमङ्गको संचार गर्दछ। रासस