बर्दिवास नगरपालिका वडा नम्बर १३ बालविवाहमुक्त घोषित

महोत्तरी — महोत्तरी जिल्लाको बर्दिवास नगरपालिका वडा नम्बर १३ लाई शनिबार औपचारिक रूपमा ‘बालविवाहमुक्त वडा’ घोषणा गरिएको छ। यो घोषणा बालविवाहजस्ता सामाजिक कुरीतिविरुद्ध समुदायले लामो समयदेखि सञ्चालन गर्दै आएको सामूहिक अभियानको महत्वपूर्ण उपलब्धि मानिएको छ।

बालविवाह अन्त्यका लागि समुदायका शिक्षक, अभिभावक, महिला समूह, युवा स्वयंसेवी, स्थानीय बाल क्लब र समाजका अगुवाहरू निरन्तर रूपमा सक्रिय रहँदै आएका थिए। यस सफलतालाई नेतृत्व र समर्थन प्रदान गरेको छ नगरप्रमुख प्रहलादकुमार क्षेत्रीको पहल र निरन्तर प्रयास, वडा अध्यक्ष लक्ष्मण सिंहको नेतृत्व र सेभ द चिल्ड्रेनको सहयोगमा सञ्चालित सामुदायिक विकास तथा पैरवी मञ्च बर्दिवासको सक्रियताले।

उत्साहपूर्ण घोषणा कार्यक्रम शनिबार आयोजना गरिएको यस कार्यक्रममा वडाभरि उत्साहको माहोल देखिएको थियो। कार्यक्रममा स्थानीय विद्यालयका विद्यार्थी, अभिभावक, महिला अधिकारकर्मी, युवा प्रतिनिधि र समाजसेवीहरूको उल्लेख्य सहभागिता थियो।

कार्यक्रमका प्रमुख अतिथि नगरप्रमुख प्रहलादकुमार क्षेत्रीले भने, “थाहा पाएनौँ भनेर हुँदैन। सरकारले बनाएका नियम सबैले पालना गर्नुपर्छ। यसको प्रभावकारी कार्यान्वयन अब हामी सबैको साझा जिम्मेवारी हो।”

वडा अध्यक्ष लक्ष्मण सिंहले भने, “यो घोषणा अन्त्य होइन, सुरुआत हो। निरन्तर निगरानी, सचेतना र सामूहिक प्रतिबद्धताको आवश्यक छ।” उनले समुदायको चुनौती, अभिभावकहरूको सोच परिवर्तन र विद्यालय–समुदायको सहकार्यका अनुभवहरू साझा गरे।

समुदायको सक्रियता र कार्यक्रम प्रभाव सेभ द चिल्ड्रेनको सहयोगमा सञ्चालन हुँदै आएको मञ्चले अभिभावक बैठक, विद्यार्थी नेतृत्व विकास, बाल क्लबको सक्रियता, बाल अधिकारसम्बन्धी नीति संवाद र घर–घर अभिमुखीकरणजस्ता कार्यक्रममार्फत बालविवाह रोकथाममा उल्लेखनीय प्रभाव परेको छ।

स्थानीय युवाहरूले आफूलाई ‘परिवर्तन दूत’ का रूपमा प्रस्तुत गर्दै बालविवाहका जोखिम र दुष्प्रभावबारे सचेतनामूलक अभियान सञ्चालन गरिरहेका छन्। यसले समुदायमा सोच परिवर्तन ल्याउन महत्वपूर्ण भूमिका खेलेको अभिभावकहरूको भनाइ छ।

आगामी कार्ययोजना बालविवाहमुक्त वडा घोषणा केवल कागजमा सीमित नहोस् भन्ने उद्देश्यसहित वडा र नगरपालिका विशेष कार्ययोजना बनाउने योजना बनाएको छ। यसमा विद्यालय, स्वास्थ्य चौकी र प्रहरीसँगको समन्वयमा ‘बालविवाह जोखिम पहिचान प्रणाली’ सञ्चालन, अभिभावक सचेतना निरन्तरता, बाल क्लब सुदृढीकरण, समुदायस्तरमा नियमित संवाद र सामाजिक निगरानी समूहलाई सक्रिय बनाउने योजना समावेश छ।

बर्दिवास–१३ को बालविवाहमुक्त वडा घोषणा केवल औपचारिक कार्यक्रम मात्र नभएर सामाजिक रूपान्तरणतर्फको एक महत्वपू्र्ण मोडको रूपमा हेरिएको छ। यसले देखाएको छ कि समुदाय, स्थानीय सरकार, संस्था र युवाहरूको साझा प्रयासले सकारात्मक परिवर्तन सम्भव छ।

कार्यक्रममा उपप्रमुख तारादेवी महतो, नगरपालिका प्रमुख प्रशासकीय अधिकृत राममणि अधिकारी, सेभ द चिल्ड्रेनका दिपक खतिवडा र पैरवी मञ्चका सोमबहादुर कार्की लगायत विभिन्न सरोकारवालाहरूको उपस्थिति थियो।