म्याग्दीको बेनी नगरपालिकाको सडक सुधारको प्रतिबद्धता, गुणस्तरलाई प्राथमिकता

म्याग्दी । म्याग्दीको बेनी नगरपालिकामा कालोपत्र भएको सडक एक महिनामै भत्किन थालेको विषयले स्थानीय सरोकारवालालाई चिन्ता बढाएको छ। बेनी नगरपालिका र निर्माण व्यवसायीले यस विषयमा सुधार गर्ने प्रतिबद्धता व्यक्त गरेका छन्।

सडक डिभिजन कार्यालय बागलुङमार्फत सञ्चालनमा आएको ‘एक निर्वाचन क्षेत्र, एक सडक’ योजना अन्तर्गत बेनी–१ र रत्नेचौरदेखि वडा नं. २ भकुण्डे जोड्ने सडकको निर्माण कार्यको गुणस्तर सम्बन्धी छलफल आइतबार बेनीमा भएको थियो।

जिल्ला समन्वय समितिको आयोजना रहेको यस बैठकले सडक निर्माणको गुणस्तर सुनिश्चित गर्न जिम्मेवारी लिने र हालसम्म भएका कामको अनुगमन गरी आवश्यक सुधार गर्ने निर्णय गरेको हो। सडक डिभिजन कार्यालय बागलुङका प्रमुख सुबोध ढकालले भने, “निर्माण कार्यको गुणस्तर सुनिश्चित गर्न हाम्रो जिम्मेवारी हो। अनुगमन गरी आवश्यक सुधार गर्नेछौं र आगामी कामहरू गुणस्तरीय बनाउने प्रतिबद्धता व्यक्त गर्छौं।”

बैठकमा बेनी नगरपालिकाका प्रमुख सुरत केसी, सडक डिभिजन कार्यालयका प्रमुख सिनियर डिभिजनल इञ्जिनियर हरि सुवेदी, वडा अध्यक्षहरू टेकबहादुर थापा र यामबहादुर कार्कीलगायत प्राविधिक, उपभोक्ता, र निर्माण कम्पनीका प्रतिनिधि उपस्थित थिए।

सडकमा बिटुमिनले फराकिलो बनाइएका ठाउँमा चिप्स नसमातेर भत्किन थालेको, र खाल्डाखुल्डी भएको विषयलाई उजागर गर्दै बेनी नगरपालिकाले पुस ४ गते भकुण्डेमा आयोजना गरेको सार्वजनिक सुनुवाइमा प्रश्न उठाइएका थिए। पुस ९ गते स्थानीय र जनप्रतिनिधिहरूले सडक डिभिजन कार्यालयमा पुगेर ध्यानाकर्षण गराएका थिए।

वडाध्यक्ष कार्कीले भने, “बेसको धुलोका कारण बिटुमिन जम्न सकेन, र यसले सडक भत्किन थालेको हो।” हालै दोस्रो चरणको कालोपत्र सकिएको र बिमिराबोट–भकुण्डे–तमाने खण्डको सडकमा संरचना तयार पार्ने कार्य भइरहेको जानकारी दिइएको छ।

सडक पूर्णतया नौ मिटर फराकिलो बनाइएको छ, जसमा सात मिटर चौडाइका डिबिएसडी प्रविधिको कालोपत्र र ढलान गरिने सम्झौता भएको छ। यस योजनाको ठेक्का विसं २०७९ भदौ ६ गते गजेन्द्र–नयाँबाटो जेभीले रु २३ करोड ३२ लाखमा गरेको हो। ठेक्काको अवधि ३० महिनाको थियो, जुन अहिले थप म्यादसहित सम्पन्न हुने तयारी छ।

सडक डिभिजन कार्यालय बागलुङका प्रमुख सुवेदीले भने, “गर्मी र सवारी चाप बढेसँगै बिटुमिन जम्न नसकेर केही समस्या देखिएका छन्। हामी गुणस्तर अनुसारको निर्माण गर्न प्रतिबद्ध छौं र आवश्यक परे सुधार गरी निर्माण कार्य सम्पन्न गर्नेछौं।”

निर्माण कम्पनीका आयोजना व्यवस्थापक सेढाइँले पनि बाढी र चिसोको कारणले क्षति पुगेको बताए। उनले भने, “गर्मी बढेसँगै बिटुमिन पग्लिएर चिप्स समात्ने प्रक्रिया सुरु हुन्छ। यदि अझै समस्या रहे, भने गुणस्तर र मापदण्ड अनुसारको सुधार गरि कार्य समापन गर्ने प्रतिबद्धता व्यक्त गरेका छौं।”

स्थानीय तह र सरोकारवालाहरूले सडकको गुणस्तर सुधारका लागि थप ध्यानाकर्षण गराइरहेका छन्, र जिम्मेवार निकायहरू पनि अबको कार्यप्रणालीलाई गुणस्तरमुखी बनाउने प्रतिबद्धता व्यक्त गरेका छन्।