जेनजीको नेतृत्व वर्तमान सरकारले गर्न सक्दैन: मिराज ढुंगाना

काठमाडौं — जेनजी अभियन्ता मिराज ढुंगानाले वर्तमान सरकार जेनजी आन्दोलनको नेतृत्व गर्न असमर्थ रहेको बताएका छन्। आइतबार आयोजित संयुक्त जेनजी आन्दोलनको घोषणा कार्यक्रममा उनले यस आन्दोलनको उद्देश्य केवल निर्वाचन मात्र नभएको स्पष्ट पारे।

उनले भने, “सर्वपक्षीय सरकारको आवश्यकताले हामीलाई उत्प्रेरणा दिएको हो। तर, अहिलेको सरकारलाई हाम्रो आन्दोलनको सही अर्थ बुझ्न आवश्यक छ। यो आन्दोलन व्यवस्था सुधार, सुशासन र देशको राज्यचरित्रको रूपान्तरणका लागि हो।”

मिराज ढुंगानाले वर्तमान अवस्थामा यदि निर्वाचन गराइयो भने अझै अस्थिरता र अनिश्चितता बढ्ने सम्भावना रहेको बताए। उनले सरकारलाई आग्रह गरे, “निर्वाचनलाई मात्रै ठूलो उपलब्धि ठान्न सकिँदैन। यसले देशको दीर्घकालीन सुधार ल्याउन सक्दैन।”

अभियन्ताले भने, “यदि हामीले देशको समस्यालाई सही रुपमा समाधान गर्न सकेनौं भने नेपाल बंगलादेशजस्तै अवस्थाम पुग्न सक्छ। त्यसैले, हामीले समग्र देशको सुधार र स्थिरता सुनिश्चित गर्न आवश्यक छ।” उनले थपे, “जेनजी आन्दोलन केवल मतदानको लागि होइन, यसको उद्देश्य देशको समग्र सुधार र नयाँ मार्गनिर्देशन हो। सरकारले यसलाई बुझ्नुपर्छ र नीति र कदमहरू यसैअनुसार लिनुपर्छ।”

यसरी उनले वर्तमान सरकारको नेतृत्व क्षमतामा शंका व्यक्त गर्दै, देशको स्थिरता र समृद्धिका लागि सर्वपक्षीय सरकारको आवश्यकतालाई जोड दिए।